A nova maglia di u SC Bastia hè stata presentata è eccu ciò ch'ellu s'ampara :

Il est à noter que la Testa Mora n’est plus présente sur le devant du maillot. En effet, les nouveaux règlements de la Ligue de Football Professionnel n’autorisant les signes régionaux que d’une superficie maximale de 25cm² sur l’ensemble du maillot, le club a opté de la faire figurer au dos, aux dimensions requises.

Stranu di vede i "signes régionaux" difesi, quand'ellu si sà chì solu u Sporting è l'ACA avianu sceltu d'adoprà un "segnu regiunale" nant'à a so maglia...

In fin di contu, a LFP ùn hè ch'è u spechju di stu pòveru paese ch'hè a Francia. Aspettemu a seguita di u cummunicatu di a Lega di Futbol chì ci spiegaria chì "les signes régionaux de plus de 25cm² sont une menace pour la République une et indivisible".

Quist'annu, festighjemu i 240 anni di presenza in Corsica di i peghju culunialisti chì l'umanità hà avutu l'intelligenza di pruduce. Evviva !

Imaginate una lezzione di moonwalk data da Michael Jackson. Ùn saria micca male per amparà nò ?

Per ciò chì tocca à e canzone corse, ci hè a squadra di musica-corsa.com.

L'idea hè sèmplice : lezzioni di ghitarra corsa in linea per 15 euri à mese (cun videò, esercizii, tablature, accordi...) ripigliendu i più grandi successi di a musica corsa post-riacquistu (cun u ritimu spiegatu, solò è intrò di e canzone...)

Tuttu què cun Paul Cesari, ghitaristu di talentu chì hà girandulatu e scene corse cù i più grandi dapoi parechji anni (da Petru Guelfucci à I Cantelli, da Tony Sampieri à Jean Cuiconi, da I Chjami Aghjalesi à L'Arcusgi...). L'omu ammaistreghja bè u so sugettu !

Per quelli chì preferiscenu amparà a ghitara flamenco, u jazz manouche, a ghitara clàssica o ancu a ghitara bassa, andate à vede imusic-school.

È da quì à pocu ci seranu ancu corsi di pulifunia.

Allora piuttostu ch'è di passà u vostru estate à fà u lonzu nant'à Facebook, perchè micca pruvà à imusic-school o musica-corsa ?

E fiure di l'addunite di fan di Michael Jackson in Parigi, Los Angeles o Sidney s'assumiglianu tutte. Decine è decine di fanàtichi in làcrime, in traccia di pienghjulà a morte di "Bambi".

À mezu à tutti quessi, sò sempre qualchì unu à avè messu un cappellu è un paghju di spechjetti di sole per circà d'assumigliassi à quellu di Thriller è Bad. Certe volte ci vole veramente à circalla a sumiglia...

Pè a morte di Ronald Reagan o quella di Jean-Paul II ùn s'era purtantu micca vistu stu gèneru di manifestazione-omàgiu-carnavale.

In Corsica dinù, d'appressu à e nostre infurmazioni, si sò visti parechji sosii di MJ. In Bastia un falsu Jackson trascinava u so caddie à u Géant Casino cù un passu di Moonwalk. A sera stessa, un antru si spassighjava in i carrughji bastiacci ballendu nant'à "Billie Jean".

In Aiacciu, Portivechju è ancu in Ghisunaccia si sò visti fan vestuti cum'è un veru Jackson Five.

Frà tutti quessi, qualessu serà u primu à scrive u lamentu di Micaellu Jackson ?

Da ritene quantunque : u "cascione à oxygène" ùn ghjova à nunda.

Di manera ufficiale, segond’à u putente Anghjulu Santini, l’UMP l’anu cacciatu di a discussione perchè sapianu ch’ellu era periculosu è ch’elli risicavanu una bella disfatta pè u votu.

À mè, mi basta di sente què per esse stumacatu : quand’ellu si vede ghjunghje a disfatta, scappemu à corri corri. Bella prova di curagiu, sarete d’accunsentu.

Ma l’affare ùn hè cusì simplice, è ùn si compie quì.

Pè tutti quelli chì si feliciteghjanu di sta ritirata di u Padduc, v’aghju da amparà parechje cose chì v’anu da rende menu beati.

Prima, ci vole à ramintà chì l’UMP (Unione di i Minchjosi Pulitichi) ùn hà una vera maiurità à l’assemblea. Anu dunque una maiurità rilativa, vale à dì ch’ellu ci hè di più upunenti chè cunsiglieri di l’UMP à l’assemblea, ma chì a maiurità hè stata scelta à traversu un votu, è da… i naziunalisti stessi, in 2004. (Iè, certi ùn lu volenu sente, ma ghjè cusì : d’una certa manera, i naziunalisti anu vutatu pè u Padduc cinqu’anni fà, mettendu Camigliù è i s’amichi in piazza).

Dunque l’UMP ùn hè veramente maiuritariu. È in faccia, ci sò l’upunenti : divisi, smizati, ci sò parechji gruppi. U più maiò ghjè quellu di u PRG di Giacobbi è Zuccarelli. Ci hè dinù tanti paesi strangeri… Scusate. Ci hè dinù u gruppu di Renucci, « Corse Social Démocrate », u gruppu di Ghjuvan Claudiu Guazzelli « Corse Nouvelle ». Senza scurdassi di i Cumunisti di u PCF di Bucchini. È ci sò i naziunalisti, l’anzianu gruppu « Unione Naziunale », oghje spiccatu in dui gruppi, Corsica Libera è PNC/Chjama.

Ci vole à seguità !

Allora, l’upunenti, sò ufficialamente, tutti, tutti contr’à u Padduc. E ragione ponu scambià d’un gruppu à l’altru, l’averete capita.

Pè i naziunalisti, di tutti i partiti, ùn c’hè prublema, ùn c’hè manera di discutà, u Padduc hè un prugettu à lampà in mare.
Pè quelli di manca, ch’elli sianu Renucci o Bucchini, listess’affare, u Padduc deve esse righjittatu. Ritruvemu a stessa pusizione ind’è Guazzelli è i so partighjani.

Ci resta u PRG. Ah, u “béhèrjé” ! Caru partitu di u “clan”, cum’elli ci piacenu.
Ci vole à ramintavvi chì l’eletti radicali ùn si sò adduniti in u listessu locu chì l’altri upunenti.
Ma perchè ?
A v’aghju da dì … Questi eletti ùn volenu micca chì u PADDUC ùn sia micca accettatu. Iè avete capitu.
Bon, hè abbastanza cumplicatu l’affare.
U PRG chì deverebbe esse a prima forza di manca in Corsica (ahahaha…) hà scopi assai più impurtanti ch’un picculu PADDUC.

Sapemu ancu chì u nome di Popaul hè statu datu pè esse ministru di u guvernu Sarko/Fillon... ma ùn hè accaduta. Vale quantunque à dì ch'elli sò più chè vicini UMP è PRG corsu... Qualchi annu fà, ùn si sarebbe detta...

Senza scurdassi chì PRG è UMP corsi si sò avvicinati, incù a paura cumuna di una presa di putere da i naziunalisti muderati. Sarebbe, infine, impussibule à pensà, chì Giacobbi, ministru novu, vutessi contr’à un prugettu Sarkozianu sputicu.

Allora, per ùn annerbà i so novi amichi di diritta, i nostri cumpagni radicali (di manca) anu prupostu chì u prugettu ùn sia dibattutu. Ghjè a ragione di a so addunita for’di l’assemblea.

Ma… perchè ?

Ideologicamente, ùn volenu tagliassi di e so idee storiche è di l’elettori : s’è u PADDUC hè vutatu, saranu ubligati di vutà contr’à u prugettu, ancu s’è li pizzica u core à fallu.
Ma vistu altrimente, sarebbe un culpacciu à i so novi amichi di a maiurità, è lascerebbe a piazza à i naziunalisti muderati è altre suluzione alternative.

A sola suluzione chì li pare bona hè dunque di scappà. Per esse in pusizione cunfurtevule incù elli stessi è incù a dritta, ùn ci vulia à vutà. Ghjè ciò chì s’hè passatu, ghjè ciò ch’elli anu pruvatu di fà sapè, è Santini l’hà capita subitu subitu.

Sta cumbotte di i falzacci frà ciò ch’è no chjamemu maiurità è u gruppu d’upusizione u più maiò palesa chì in Corsica, a pulitica ùn hè un’affare d’idee.

S’è, per tamanta sfurtuna (è accaderà!), l’unu di sti dui gruppi si trova à u capu di l’assemblea l’annu chì vene, avemu da esse surpresi, assai surpresi.
Sopr’à tuttu incù a mudificazione di l’elezzione chì hè stata vutata pocu ghjorni fà à l’assemblea di Francia, chì dà un “bonus” à a squadra vitturiosa di 9 piazze... Ci volenu veramente piglià per conni.
Allora, ch’ella sia detta, u PADDUC ùn sarà vutatu, ma hè assai luntanu d’esse mortu, è facenu tuttu, tuttu tuttu, per ch’ellu sia adupratu l’annu chì vene o da quì à pocu.
Dibattiti d’idee, ùn ci n’hè più. Ci piglianu pè baulli, è ne simu cuntenti.

Simu « mal’barrati »… Cum’elli dicenu.

A sapemu bè, avete da dicci ch'è no semu azezi, sempre à lagnacci di tuttu è ch'è no ùn semu mai cuntenti. Hè vera, è casca bè era a "Fête de la Musique", invenzione di Jack Lang à l'epica di a manca à u putere, vale à dì u seculu passatu.

Digià, ci vuleria forse à scambialla di nome, perchè micca "Fête du bruit", "Festa di u tazzu è di a ghjente briaca per sti carrughji" o "Burdellu di u rimore", currisponderia megliu à a realità.

Perchè si passa cusì in veru, u carnavale di u 21 ghjugnu. Ogni pseudo-gruppu di pseudo-musicanti si crede in l'òbligu d'andà à ughjulà e so canzunacce in ogni carrughju.

U peghju hè ch'ellu viaghja : tam-tam è djembé d'intermitenti in ciavatte, falsi hardos capilluti è cughjosi chì mughjanu, giovani lonzi chì si piglianu per mostri di u rock, fanfara di a pulizza chì marchja à u rìtimu di "Tiens voilà du boudin", canterini corsi chì facenu un macellu cù e riprese di Compañero è Sinfunia Nustrale.

Ancu peghju : piace à a ghjente : centinaie d'oziosi in perdizione per i carrughji, in brama di chè ùn si sà ma in traccia di vagabundà cum'è persi. Certi sò arruvinati da a bieraccia calda, è di siguru puzzulenti perchè ballanu nant'à i tubes di Calogero è di Jonnhy Halliday dapoi ore sane.

Iè, sò agorafobu, è allora ?

In più di quessa, u tema quist'annu era "50 ans de chansons françaises". Cum'è s'ella ùn bastava micca, ci anu ancu da impone un sùppulu di franchouillardise in sta panicca senza nome. Semu dunque partuti per 3 o 4 ore di ciò chì a cultura francese face di megliu : Renan Luce, Cali, Joey Starr, Didier Barbelivien, Michel Sardou, Florent Pagny, Patrick Bruel, Doc Gynéco, Stanislas, Vincent Delerm, Richard Gotainer, Mylène Farmer, Louise Attaque, Yannick Noah... eccetera, a lista hè troppu longa. Peghju ch'è un cuncertu di Les Enfoirés !

Bon, avete capitu, eiu mi stò in casa per sta festaccia chì marca u principiu di u carnavale di l'estate.

Ùn a sò ma a Fête de la Musique puderia avè un interessu s'ellu si vidia cose più orìginali : un gruppu di slameurs di Lupinu cantà L'Armata di l'ombra, a fanfare di i flicchi ripiglià Antisocial, Le Choeur d'hommes de Sartè briunà "I will survive", u gruppu di hardos cughjosi ughjulà "T'aghju intesu caminà di bughju in la campagna", Voce Ventu ripiglià "ça plane pour moi", Jean-François Bernardini cantà "Highway to hell" è Jean-Martin Mondoloni in a pelle d'Helmut Fritz.

Tandu sì chì faleraghju anch'eiu in carrughju !

Ch'hà da fà Paul Giacobbi ? puderia esse u prùssimu ghjocu di télé réalité à a moda corsa.

Sò parechje e pussibilità :

Scenariu 1 : a frittella. Giacobbi face u so venachese è accetta a pruposta di Sarkozy d'entre in un ministeriu è piglià a CTC cù a diritta. Micca siguru ch'ellu piaccua à tutti l'elettori di manca ma face un pezzu chì vutà un colpu à diritta, un colpu à manca ùn dirangia à tanta ghjente in Corsica.

Scenariu 2 : u lonzu. Paul manda Sarko à spassu è si stà cù i so vechji fratelli di lotta di u PRG, l'Alfonsi, Milù, Alessandrini è cumpagnia. Cume di sòlitu, hè l'UMP chì vince l'elezzioni territuriali è a manca si stà tranquilla à dorme in l'uppusizione., ciò chì arrangia à tutti.

Scenariu 3 : a terza via ? Popol, stumacatu da l'incumpetenza di Santini è Rocca Serra piglia e cose in manu è cerca a terza via cun "l'omi di prugressu" fendu un'unione a più larga pussibule à u terzu giru, perchè micca cù i naziunalisti muderati. Piglianu a regione è si mettenu infine à travaglià per stu paese chì n'hà tantu bisognu.

Scenariu 4 : la reconversion. Stumacatu da e pruposte di Sarkozy (micca abbastanza interessanti per ellu), da a pulitichella di l'UMP è di u PRG, Giacobbi abanduneghja a pulitica, u cunsigliu generale è a Corsica per lanciassi in una carriera nova : "doublure" di Casimir, u bravu mostru aranciu.

Chì serà u scenariu ? A risposta a settimana chì vene cù u rimanimentu ministeriale di Sarko. Una cosa hè certa, hè Paul Giacobbi chì tene e chjave di l'avvene di a Corsica. Sarkozy l'hà capita dapoi un pezzu fenduli a so pruposta.

Allora, chì serà u più impurtante per ellu ? A so carriera o travaglià per u so paese ?

A Corsica hà a furtuna d'avè parechje riserve naturale per sgiò chì u Statu francese prutege. A più cunnisciuta hè quella di "Punta d'Oro" (chjamata à i tempi antichi Cala Purcina).

Ma ci hè dinù quella di San Fiurenzu, più precisamente in Fòrnali. Custì, à u principiu di L'Agriate (scusate, ci vole à dì "Le Désert des Agriates", face di più "exotique") ci hè una piccula riserva di sgiò chì ponu fà ciò ch'elli volenu cù a prutezzione di u Statu.

Digià in u 2000 (!) u muvimentu A Manca Naziunale avia fattu stu situ chì vi spiega tuttu.

Pè riassume, i sgiò di i lochi (Béguin, Jean d'Ormesson...) si sò pigliati u duminiu pùblicu è anu custruitu di manera illegale i so hangars è pontons per i so battellacci.

È chì face u Statu ? Induvinate ! Cundannati in un primu tempu à distruge ste custruzzioni illegali, u Conseil d'Etat, a cima di u Statu, u fiorfiore di a Republica, vene d'annulà stu ghjudicamentu. Megliu : u Statu deve pagà 3000 euri à a SCI du Cap, prumutore di i lochi...

Dapoi oghje, una videò messa in linea nant'à Dailymotion mostra un filmatu di u 2000 realizatu da Corse TV nant'à stu sugettu è mai mustrata à a televisiò. Fatevi a vostra opinione da per voi...

Eiu aghju decisu di sustene l'amichi di Sarkozy è Jean d'Ormesson. Dumane, compru u Figaro !

Per principià femu un test. Chì hè u vostru primu gestu quand'è vo v'arrizzate a matina ?

S'è vo rispundite ch'ellu hè d'accende u vostru ordinatore è di cunsultà u vostru prufilu Facebook, cumminciate male.

Ùn pudete stà senza cunsultà i vostri messagi, u vostru forum preferitu, i cummenti lasciati in a notte nant'à u vostru blog ? Mettite parechje volte à ghjornu u vostru statutu nant'à Facebook cù u vostru iPhone (d'altronde grazia à ellu plasticate u vostru forfait...) ?

I vostri "amichi" di FB (chì di siguru, ùn avete mai vistu...) vedenu i vostri ritratti di vacanze nanz'à i vostri "veri" amichi ? Vi site digià tagatu nant'à un ritrattu ?

Ancu peghju : chjamate i vostri "veri amichi" per parlà di ciò ch'è vo avete scrittu è fattu nant'à Facebook ? Quandu site fora, ùn pudete stà 5 minuti per vede s'elli ci sò stati cummenti nant'à u vostru prufilu ?

Tandu ci hè da trimà da veru. Fate parte di sta generazione d'ultrà-cunnettati, di Facebook addict chì cummencianu à inchietà.

U primu à inchietassi hè statu Nicolas Carr, giurnalistu americanu cù un articulu intitulatu Est-ce que Google nous rend idiot ?. S'interrugheghja nant'à a nostra capacità di cuncentrazione, sminuita nant'à internet. A lettura è l'anàlisi di l'infurmazione sò cambiate di manera prufonde nant'à a tela.

Cuntinuveghja un antru americanu in Wired, giurnale di riferenza per ciò chì tocca à u net : "l'ultrà cunnettività hè un sìmbulu di puvertà". Glups.

Pocu dopu si pudia leghje in u New York Times : "quelli chì anu una vera è ricca vita si prutegenu è si tènenu luntanu da u chaos di u web". Pigliatevi què !

Dunque à voi chì vi piace di fà tutti sti testi cumplettamente inùtili di Facebook, di scrivevi à i gruppi sempre più ridìculi è di carcavvi di points cool à difettu di points culu, cumminciate forse à riflette.

Allora hè forse u mumentu di spenghje u vostru PC è di fà certe cose ch'è vo ùn faciate più dapoi qualchì tempu : ascultà un discu, leghje un libru, spassighjavvi appena, mette una turnata à u comptoir. O ancu megliu : ùn fate assolutamente nunda.

Bon, eiu sò decisu, spengu tuttu : internet, iPhone è ordinatore. Almenu per un'ora...

A vuciata corre nant'à a tela, hè ripigliata da Le Figaro è u Nouvel Obs.

U deal : Paul Giacobbi entra à u guvernu, è à e prùssime elezzioni in 2010 u PRG è l'UMP s'arrangianu per piglià a CTC.

U venachese dice ch'ellu ùn hè à currente di sta vuciata, chì nimu li hà dumandatu... per avà.

Risposta da quì à pocu. S'ella si cunferma, serà un veru schjaffu per Camillù. Sarko lasceria cascà u so amicu di sempre di Cala Purcina.

Si pò pensà dinù ch'ellu saria a fine di a "terza via", cun i "cursisti", a cusì detta "ghjente di prugressu" è naziunalisti muderati.

Di tutte manere, si sà cum'elle finiscenu l'elezzioni in Corsica. Dapoi 200 anni, sò sempre i listessi à vince...