10 rigali à fà pè Natale

A cullezzione di i "Lego construction" corsi s'ingranda. Scavate, sbundate, bettunizate ! Tutti l'omi pulitichi corsi sò dispunibuli.

Cun stu ghjocu, organizate i vostri marcati trafficati, cumprate pè millioni di preservativi, empiitevi e stacche, tichjatevi di suvvenzioni, manghjate à buzeffu.

Un ringalu di circustanza in stu Natale 2010. Attenzione, "rupture de stock" in vista, spicciatevi !

Pigliate un rigalu di merda. Caru assai è ch'ùn viaghja micca : offrite l'AMG 800.

Avete un amicu merre, cunsiglieru generale, elettu municipale o piazzatu à a CTC ?

Pè a so prussima elezzione offrite une poche di false precure. Pudete esse siguru ch'ellu ùn anderà micca à scambiallu in magazinu.

Amparate è ghjucate cù a chìmica corsa : eroina, cuccaina, marijuana, LSD, ecsta, GHB, popper...

Quessu u rigalu, pudete esse siguru dinù ch'ellu ùn serà micca scambiatu contr'à "Tempi Fà 3".

"Le braquage pour les nuls" vi spiega cumu riesce u vostru braccasgiu, senza favvi chjappà.

Cusì vi puderete inventà u vostru veru braccasgiu, cum'è i veri mittomani.

Fate piacè à u vostru amicu mittò, offrite una vesta Millet. Di siguru, ùn hè micca racummandatu di mette a vesta per andà in muntagna, ma piuttostu per andà in buatta è in i lochi à a moda.

A cuccaina hè diventata troppu cara per voi, site sbaiuccatu per essevi troppu drugatu, ma vulete cuntinuvà à mettevi appena di pulveretta in u nasu ?

Pruvate a farina pisticcina AOC.

Mini Cooper, Hummer, Cayenne... Tutti i mudelli sò dispunibuli, in Majorette. Di tutte manere, cosa scambia d'avella in veru ?