A ritruspettiva di l'annata

Hè lanciatu u blog A Piazzetta è si festighjeghjanu parechji anniversarii : i 30 anni di sti vechjoni di Chjami Aghjalesi è dinù i 30 anni di l'epupea di u SECB chì hà fattu sunnià a Corsica sana cun Papi è Rep.
Un antru Johnny si face rimarcà : ssu catinu d'Halliday si mette à cantà in corsu cun Michel Mallory .
Vi ne site digià scurdati ma hè dapoi ghjennaghju ch'ellu ùn si fuma più in i caffè.
È ch'ellu si puzza di più ?
A Piazzetta ne prufitta pè lancià una campagna contr'à i rancichi chì ùn mettenu mai a soia à u comptoir !

Infine, s'hè parlatu assai di e famose lasagne di u scagnu d'Ange Santini dopu à l'incendiu à a CTC...

I Muvrini passanu à a Star'Ac. Pour éliminer Jean-François, faites le 1, pour Alain, faites le 2 lancia Nikos. Ma chì linguacce... Tutti ghjelosi di u so successu ? Elli almenu ci la facenu à fà cantà i pinzuti in lingua corsa...
U Sporting ridiculizeghja à Auxerre in cuppa di Francia. Per una volta ch'ellu ci hè u spetaculu in Furiani...
In tantu, Alizée dice chì anch'ella hà l'autocollant nant'à a so vittura.

Ma u buzz di ferraghju vene da a Lìbia. Torna à vultà u puttachju di l'orìgine corse di Kadhafi... U web si scatena. E l'orìgine corse di Sarkozy ?
Ma l'attualità vene marcata da l'elezzioni municipale chì venenu. Hè dinù u principiu di l'affare Séguéla... è ancu di l'affare Kébé.
Infine, hè tandu chì Sarko lancia una frasa diventata famosa à u Salon de l'agriculture è A Piazzetta si dumanda cumu si dice "casse toi pauv'con", in corsu ?

Di marzu semu fieri di participà à a mossa mundiale contr'à u gruppu Tokio Hotel in stu mese di marzu.
Cum'è di solitu, bastanu qualchì centimetru di neve pè paralizà l'isula sana... Hè u mumentu di tirà u bilanciu di e municipali è Rachida Dati si face fotografià in Paris-Match.
I tempi sò duri ? Noi prupuniamu un boycott di a merendella di Pasqua.

È cum'ellu ci vole à esse pusitivu, 10 ragione d'esse felice di vede u Sporting stà in segonda divisione (nò, ùn dicu micca "Liga 2" ma "segonda divisione" !)

U mese d'aprile hè statu u mese di l'hoax nant'à A Piazzetta... Un hoax hè una magagna, una falsa infurmazione chì circuleghja nant'à u net è chì tuttu u mondu piglia à u seriu. Prima burla cù a magagna di a visita di u Dalai Lama in Corsica. A LDH publicherà un cumunicatu in Corse-Matin pè nigà.
Segondu hoax cù e manifestazioni anti-francesi in China. Un muntame realizatu cun Photoshop serà publicatu in Corse-Matin...

Si parla dinù di ricunnosce a paghjella à l'UNESCO. Per una museificazione di a cultura corsa ?
A Corsica trema di vede sorte di prigiò l'inchietante Tommy Recco, ancu più gattivu ch'è Jack Torrance è Hannibal Lecter. Pulemica nant'à u blog cù un articulu di A Bistuca nant'à i cacciadori. Minacciatu, l'autore di l'articulu ùn scriverà mai più pè A Piazzetta.
Hè d'aprile ch'ellu sparisce u poveru Michel Moretti.
À a CTC i capizzoni si feliciteghjanu di a so reelezzione.

Cuntinuveghjanu i rimusci di l'affare Séguéla è ùn hè semu ch'è à principiu... L'amicu di Sarko hè autorizatu à custruisce in Cala Longa.
Razzisimu anti-corsu : si scatena Frédéric Thiriez contr'à u Sporting.
Frédéric Antonetti mughja sempre è ne prufitta per difende anch'ellu à Bastia in st'inghjustizia. Dice u casinchese chì "Si la société française correspond à ce qu'il se passe dans le football, je vous le dis on est mal barrés". Iè, semu mal barrati o Freddy...
Sequenza "Les enfants de la télé" : arricurdatevi di u passagiu d'un certu Alain Orsoni in 1990 à Ciel Mon Mardi...

Pulemica nant'à a campagna publicitaria di l'ATC : Corsica, futura riserva indiana ?

Mentre chì Sbanditu s'abbuchja tutta a filmografia d'Oksana, s'ampara chì Muriel Robin apre un risturante in Balagna. I pippulacci attaccanu !
Una volta di più, si cummemureghja u tristu anniversariu di u 5 maghju 92 cù un stadiu sempre scandalosu. Per Paul Giudicelli di a CAB, Furiani sarebbi "cunfurtèvule"... U pudemu aspettà torna parechji anni u nostru stadiu.
Ridemu appena cù i gendarmi : torna appena è facenu saltà a Posta ! Ancu a CGT prutesta...
Di maghju ci hè un dibattitu à l'assemblea nant'à e lingue regiunali è a so scrizzione in a custituzione francese. Per sente chè ? U presidente di l'assemblea dì chì "il est interdit de s'exprimer autrement qu'en français dans l'hémicycle"... Si passa di cummenti. À st'occasione, A Piazzetta si face cunnosce participendu à un dibattitu nant'à La Chaine Parlementaire. In tantu, a lingua corsa hè pruibita à l'ANPE...
Sempre in brama d'una causa persa è luntana (Chiapas, Bétancourt, Obama...), i bobò sò di surtita cù e bandere di u Tibet.

Per prutestà contr'à a manumessa di Veolia in Corsica, ci hè menu mondu. Purtantu, a world company ci face pensà à u libru di u FRC esciutu in l'anni 70 "Main basse sur une île". Più ch'è mai d'attualità...
È chì Emile Louis si face brunzà in Casabianda, a sapiate ?
A CTC cerca di rilancià u trenu corsu. Ma Ange Santini hà a ghigna, u trenu hè cascatu in panna.
Allora à A Piazzetta lancemu u dibattitu : à quandu una squadra naziunale corsa ?

Ah u principiu di l'estate cù i primi pumataghji... A stagione hè lanciata è semu partuti pè trè mesi d'infernu.

A Piazzetta lancia a so campagna d'estate contr'à i rancichi.

Dopu à Séguéla, Sardou, Clavier, ci dumandemu quale serà a prussima closcia à custruisce in Corsica. Bigard ? Pernaut ? Artur ? E scumesse sò lanciate.
Ci vole à dì ch'ella hè longa a lista di i mullizzi...
Pè u prefettu tuttu và bè, trova chì a lege liturale hè rispettata bè in l'isula. Si pò cuntà nant'à u Statu pè priservà e nostre coste...
Si manifesteghja in Balistra pè dì nò à a bettunizazione.

Di ghjunghju ci campemu cù un Euro di ballò di grande qualità : cazzuttate di hooligans briaghi, insulte razziste, baruffe... Favurita pè a vittoria, a Francia si face ghjucà à a risa è Raymond Domenech assicureghja u spetaculu. Rilancemu u dibattitu : chì selezziunadore pè una squadra naziunale corsa ?

PPDA si face mette fora da TF1. Perchè micca un ritornu di Jacques Bastianesi

I vechji cucchi di l'Académie Française sortenu da a so tomba per dì nò à e lingue regiunali.

In una settimana, Bastia hè privata d'acqua è d'elettricità. U Terzu Mondu principia in Corsica...
I Corsi elli si mubilizeghjanu per avè a TNT. Semu salvi.

Dopu à l'affare Kébé, A Piazzetta prupone un best of di i striscioni d'insulte innù i stadii è si contanu i flicchi in e pagine di u giurnale...

Gilbert Casanova, alias Gilbercopter si face chjappà cun parechji chilò di tizzoni. Casca male, dichjarava qualchì mese fà à Alta Frequenza chì "la drogue, c'est mal;...

Effettu Sarkò ? In Barchetta un novu radar vi surveglia è ci hè sempre di più flicchi in Corse-Matin.

I conni sò di surtita : u poveru tippu di Christophe Barbier a si caccia torna cù i Corsi.

Vi ramintemu chì u 14 di lugliu deve esse festighjatu in Corsica : hè tandu chì Pasquale Paoli hè statu elettu capigenerale di a Nazione Corsa in u 1755.

Baruffa in u banditisimu corsu : a pulizza conta i morti mentre ch'elli cascanu unu à unu...

Una inchiesta internaziunale di i prufessiunali di u turisimu dice chì i turisti i peghju sò... i Francesi. Vi stona ?

Dui dibattiti infiamanu e discussioni nant'à u blog : quellu nant'à u ritornu d'un certu Alain Orsoni è u stranu silenziu di i media nant'à u so passatu.
Un antru nant'à e canzone di I Mantini.

Hè digià l'ora di tirà un primu bilanciu di i pippulacci di l'estate.

È per ùn brunzà micca cumplettamente conni, vi racumandemu a lettura di l'ultimi libri di Marcu Biancarelli...

Si principia forte d'agostu. Ùn hè micca u mese di a BNP. Un articulu in u giurnale mette u focu. A banca prupone facilità per vende terreni à i strangeri perchè "a dumanda lucale hè troppu dèbbule..."

In più d'esse ladri, sò dinù bugiardi ! Davanti à a mubilizazione, u pruduttu di a BNP hè ritiratu.

Hè l'estate è u sole pichja. In Sant'Amanza volta a pirateria corsa dopu à 500 anni di silenziu. a vittima : un yacht di riccone.

Jean-Chri hè elettu pippol di l'estate è sò lanciate e tong IFF.

L'Argentella hè pulluata è a prefettura s'imbroglia.
U 15 agostu hè più ch'è mai un infernu è a Corsica hè soprapupulata. Paesi, piaghje, GR20... È dì chì pè certi ùn ci hè abbastanza turisti !

Avemu ancu trovu un turistu appena speziale chì si face brunzà à u mare : u mostru di Montauk.

U prublema hè ch'elle mancanu l'infrastrutture per accoglie tanta ghjente, cum'è e stazioni di trattamentu di l'acqua.
Risultatu : una prima pulluzione à u mare è po subbitu una segonda più tardi...

Hè tandu ch'ellu nasce l'affare Clavier. Occupazione, colpu di filu à Sarko, licenzimentu di u rispunsèvule pulizzeru... Cunniscite a storia.
Ci pudimu pone e dumande nant'à e pastizzate di Camille de Rocca Serra : merre, presidente di l'Assemblea è prumutore immubiliare...
Stranu dinù un articulu esciutu in Corse-Matin chì difende u so prugettu di stesa di u portu. Mancu bisognu di fà campagna cusì...

Ùn ci n'hè ch'è per u PADDUC ! Thomas Dutronc (futuru Tumasgiu Di u Ceppu ?) prufitta di l'emissione ind'è Drucker pè piglià a difesa di i naziunalisti ! Pesta !
Quand'ellu si ne parla à Ange Santini, ellu, fughje davanti à una giurnalista di FR3...

In tantu, si riflette à a creazione di riserve d'indiani di Corsica...

A Brise de Mer ella, ùn cunnosce micca a crisa.

A carne purcina corsa, ella, face un pezzu ch'ella hè in crisa. Una vera robba per i cani...
Facebook a sapete, piace assai à i Corsi. Serà per facilità u travagliu di a pulizza è di i RG ? U paralellu cù u lugiziale Edvige hè prestu fatta.
Ne pruffittemu per lancià una campagna per una cursizazione di i nomi di marche ! È perchè micca ?

Hè u principiu di l'inguernu, infine ! I pippulacci sò partuti è si puderà accende u carminu.

Ma hè disgraziatemente dinù u principiu di a stagione 8 di a Star'Ac. A Piazzetta vi dà 10 ragioni d'ùn micca fidighjà st'emissione.
Ne prufittemu per aghjustà u Top 10 di e canzone chì duverianu esse interdette, da Claude François à Julien Doré.

Ma ottobre marca u principiu di a crisa è ùn ne semu ch'è à u principiu. Una volta di più, a Marseillaise hè fischjata à u Stade de France. Sta volta ùn hè micca colpa nostra...

L'armata francese ella durante un cuncertu in Bastia ne prufitta per cantà u Diu vi salvi Regina... Una pruvucazione di Sarkò o u principiu d'una prova d'amicizia ?

Baruffa in Aiacciu à u quartieru di i Jardins de l'Empereur. I media parigini n'hè prufittanu torna una volta pè dinunzià u razzisimu di i Corsi. Sempre cusì faciule è talmente rassicurante.

È Clavier, cosa diventa ? Eccu chì avà riceve minacce è hà a paura.
I zitelli sò entrati in scola dapoi un mese è hè tempu di a "dictée di Bastelica;. Guasi u paese sanu hè cunvucatu "senza ogettu" da i gendarmi per una vechja storia. In l'anni 40 dinù, si cunvucava "senza ogettu". Purtantu l'affare stona poca ghjente in Corsica.

A CTC dà una suvvenzione di 460 000 euri à u Giru di Corsica diventatu u Giru d'Aiacciu. I nostri capizzoni ùn anu mancu più u rispettu pè a crisa. Purtantu, ci ripetenu sempre chì e casce sò viote...

Vi manca u PADDUC ? V'inchietate, n'avemu parlatu pè fà u listinu di l'associ chì sò opposti. Stunante...

Ah u mese di nuvembre... E so prime castagne, u so Halloween. Mancate d'edee di custumi chì facenu a paura ? Vi ne prupunemu 10 !
Serà l'occasione di crucià forse a squadra d'Arozza...

Crisa o nò, cunniscite u prezzu d'un terrenu in Pinarellu ? Da spaventassi da veru.

Certi preparanu digià i so rigali di Natale. Perchè micca a puppatula vodù di Sarkozy ?

Dopu à Halloween, un antru orrore : quellu di a serata Beaujolais & Figatellu.

A Corsica cunnosce unu di i peghji auturni di tempacciu di tutti i tempi è batte u so record d'alertes oranges.

Ma u mese d'ottobre hè quellu d'un terramotu puliticu in America cù l'elezzione di Barack Obama. Nasce a speranza d'un mondu più ghjustu. Forse s'aspetta troppu d'ellu, nò ? I bobò elli si campanu.

In quantu à noi ci dumandemu, à quandu l'Obama corsu ? E territuriali di 2010 sò vicine...

Jean-Christophe Angelini hè digià prontu è face campagna in l'emissione di Karl Zéro.

In Furiani, sempre listessa cosa : baccalà per i sustenidori bastiacci ! Vita di merda...
VDM hè dinù u grandu successu internet di l'annata.
Terrurisimu : l'islamisti afgani inventatu u primu sumere kamikaze. Bilanciu : un pulizzeru tombu. Da dà l'idee à certi ?

Appena da per tuttu si festighjeghja l'ottu di dicembre. Ma nanzu di sciaccavvi u vostru pezzu di figatellu, sappiate almenu à ciò ch'ella currisponde sta festa !

Per una volta hè dinù a festa in Furiani, u Sporting batte l'ACA in un set : 6-2. Semu tranquilli pè dece anni !

Britney Spears face u so ritornu à a Star Academy. Fanfan Vendasi ellu vince u Rond Point Academy cù u so giratoghju di Natale.

L'occasione per noi di davvi i 10 rigali ch'ellu ùn ci vole micca à offre quist'annu.

Di tutte manere, hè a crisa dinù per u puverettu di Babbu Natale...

Per infurmazione, sappiate dinù chì l'elezzioni americane si sò passate male à u Texas, à Corsicana City. Avemu fattu a nostra inchiesta, si parla d'arubbecciu eletturale.

A ghjustizia anti-terrurista ùn sà più ch'è inventà : eccu a guardia à vista per attentatu ancu fattu. L'avete vistu u filmu Minority Report ?

George Bush ellu si riceve una ciavatta cum'è rigalu d'addiu in Irak. À bas Bush ? Forse si puderia lampà dinù unepoche di Meindl à Veolia per Natale...

Cum'è di solitu, l'annata finisce male : in Bastia si sprufonda un muru in piena cità, in Lupinu hè un casale chì minaccia è in Aiacciu sò tonne di mullizzu à accatastassi. U Terzu Mondu principia bè in Corsica...

Eccu, l'annata 2008 s'hè compia. Circheremu di fà peghju quist'annu chì vene !