Main Basse sur île, libru maestru di l'anni settanta, merita d'esse lettu trenta anni dopu, cù u rinculu. Certi affari risortenu vechjeschi, d'astri più ch'è mai d'attualità.

Cusì ne hè di a manumessa in l'isula di i grandi gruppi fresteri chì cercanu di sfruttà a Corsica cù una sola lògica : quella d'empiesi e stacche. In l'anni sessanta i grandi gruppi cumpravanu èttare di terreni in bor'di mare ch'ùn valianu nunda. Ma sapianu ch'un ghjornu, u liturale corsu valeria assai caru.

Oghje l'oru di a Corsica si chjama l'acqua. U Mediterraniu ne manca di manera tremenda, cum'è in Spagna induve a situazione hè digià crìtica, o in Sardegna.

In Corsica acqua n'avemu à sbuzeffu, per via di l'altezza di e nostre muntagne. Oghje st'acqua hè gestita assai male, ùn ci la femu à ritenela abbastanza, ma si puderia vendela un ghjornu à a Sardegna.

In un cuntestu mundiale induve l'acqua manca di più in più allora ch'è no ne cunsumemu sempre di più, u prezzu di l'acqua ùn puderà ch'è cullà. È tutta st'acqua chì oghje parte à u mare senza esse ritenuta valerà più tardi assai caru.

A sanu bè i malignoni di a finanza. Veolia, gigante francese è vera World Company, pianu pianu s'impone in Corsica. L'intrapresa s'hè digià impatrunita di i trasporti. A so filera, Kyrnolia (chì bellu nome, cusì puèticu è nucente !) s'impone in u duminiu di l'acqua.

Corse-Matin ci ampara ancu ch'ella dà l'acqua à un terzu di a pupulazione di a Corsica.

Tuttu quessa per dimustrà "l'attachement de l'entreprise à la Corse" (sic)... Grande abituata di e campagne di cumunicazione, Kyrnolia s'hè offerta una publicità tamanta in prima pagina di u cutitianu. Cusì bravi giurnalisti chì sò cusì pocu crìtichi !

Ma lighjite à Main basse sur île. Forse daretu à "l'attachement", ci hè un'antra lògica, quella di u soldu, di a rentabilità è di u prufittu.

È serà normale chì qualcosa chì appartene à a Corsica è à u so populu, l'acqua, puderia esse privatizata da una intrapresa frestera, cù u solu scopu di guadagnà u più pussibule soldi ???


tags : kyrnolia veolia corse