Dopu a vista di u ministru di l'internu, hè tempu di festa. 14 milioni d'€, face assai per risponde à prublemi puntuali.

Eppuru ci hè da dumandà si s'è a perfusione posta di modu regulare à l'agricultura corsa serà capace à curà la? Pare di nò! U prublema fundivu ferma sempre acutu (in 2007 : 1 stallazione per 22 partenze in ritirata). A quistione di u debbitu bancariu è suciale ferma posta sana sana. U PADDUC hè statu cuncepitu à prò di u tuttu turisimu è i prudutti corsi sò cuntrafatti (impurtazione massiva di latte per pruduce un casgiu chì di corsu ùn hà chè u nome è solu 5% di u salame hè veradimente casana)...

È quandu l'agricultori corsi turneranu à lagnà si, li diceranu : "li ci ne vole sempre di più!". Eppuru, u ministru Barnier ùn cuntrastava micca incù agricultori ingordi, manghjoni di prime. Di punta à u ministru, ci eranu ghjente chì sanu ch'ella hè pussibile di travaglià è di campà incù dignità di a so pruduzzione in Corsica.

Medicina miraculosa, ùn ci n'hè. Ma a faranu sti soldi à rifiatà l'agricultura corsa? Tenite l'esempiu di a sicchia. Cunniscimu a prublematica di u scambiu climaticu à u livellu mundiale. A sapimu chì a Corsica serà sottumessa ogni annu à a sicchia o à u timpacciu. Quantu tempu averemu da risponde à sti capatoghji incù una manata di soldi? Ùn ci invita u ghjudiziu à trattà u fondu incù metudi preventivi? Eppò l'agricultura corsa ùn averà micca bisognu, anzi tuttu, d'un pianu di sviluppu durevule, realista è di prima trinca?

Per u particulare di l'agricultura, quant'è per l'altre quistione, a suluzione, ci vole ch'ella fussi pensata è messa in ballu quì. Ci vole ch'ella fussi capace a Corsica, à anticipà i prublemi è à arregulà li capunanzu. Per ch'ella campi l'agricultura corsa, ci vole ch'ella pensi oramai à primurà più chè à curà.