Chì Corse-Matin parlessi di i prughjetti di a municipalità di Georges Mela, quessa pò, hè nurmale. Hè u so rolu. Hè un giurnale di vicinanza chì si deve di parlà à quandu di l'affaccata di Babbu Natale in Perelli d'Alisgiani, à quandu di e vacanze di Jean-Pierre Pernaut...

Eppuru, à leghje st'articulacciu, ci hè da dumandà si s'è Corse-Matin hè sempre u giurnale d'infurmazione lucale o s'ellu hè diventatu un urganisimu di prupaganda nun solu à prò di l'UMP è di i so eletti in Corsica ma dinù di e multinaziunale.

Più chè u fondu, hè a forma chì mi pare sgalabbata è malvenuta. Volens nolens, nici nicente, sottu sottu, Corse-Matin hè un giurnale indiatu.

"La nécessité de l'extension du port de plaisance aujourd'hui saturé"

Per esempiu, u titulu di l'articulu in causa, ùn hè mancu una citazione di a municipalità. Hè a pusizione ufficiale di Corse-Matin. Amparemu, cum'è un argumentu d'auturità, ch'ellu hè dinù u parè d'un certu Mr Rodriguez, un amicacciu di a Corsica chì vende i so battelloni à i ricconi di u mondu sanu. N'avete voi un Mangusta ? N'aghju cummandatu unu ma l'aspettu sempre... Cum'elli sò longhi!

Ingrandà u portu per vende i battelloni di Mr Rodriguez?

Eppò, nant'à u fondu, chì n'anu da fà i Purtivechjacci d'un portu chì possa accoglie 900 à 1000 battelli? Per u più, strazianu à buscà si un alloghju tuttu l'annu, ma i penseri di certi sò d'accoglie i spacconi di u mezu mondu... U suciale, mi diceranu, abbisogna prima di tuttu ch'omu produca ricchezze. Ma quandu veneranu i 900 battelloni venduti da Mr Rodriguez, ci volerà forse ingrandà u portu da ch'ellu possa accoglie e vendite à vene di stu sgiò...

Candide diventa giurnalista à Corse-Matin !

Tenite un antru esempiu... In i dui ultimi numeri di "Le journal de la Corse", avemu avutu l'asgiu di leghje duie interviste cumpiacente d'Ange Santini è di Georges Mela. Nisuna critica! Chì tippetti i nostri eletti ! Grazia à Corse-Matin, Candide hè sempre vivu...