Scàndalu : u braquage à u cunventu ùn raporta guasi nunda

À troppu fidighjà Scarface è Spaggiari à a televisiò, si finisce per francà u passu.

Ind'i tempi, un braquage à u cunventu u lindumane di a Settimana Santa era cuccagna : c'era almenu di chè cumprassi una vittura è flambà parechji mesi.

U hold-up di u cunventu San Còsimu è Damianu di Sartè l'ondeci d'aprile scorsu face piuttostu pietà : solu 2000 euro.

Spartuti à trè, face pocu. Semu luntani di u "Casse du siècle".

Solu di chè pagassi qualchì dosa di coccaìna, appena di shit, una buttiglia di Johnnie in una buatta minchjò, u pienu d'essenza per a 205 è un paghju di Nike.

I picculi Tony Montana sartinesi ponu esse dillusi.

Purtantu, Corse-Matin di u 5 marzu scorsu a dicia chì a Chjesa di Corsica hè fusciata : Les comptes de l'Église dans le rouge prevenia u giurnale.

Allora cunsiglieremu d'altri braquages chì ponu rapurtà di più è chì sò cusì periculosi ch'è di braccà un frate di 84 anni : u cunventu di e sore, i vechji di a MAPAD, i Restos di u core, i myopathes di u Téléthon, i SDF, l'associu di sustegnu à Haïti, quelli di l'Eveil.

Iè, a Corsica, và megliu.