È qualessu serà u "village préféré des Corses" ?

Furtunati quelli chì ùn sò nè nant'à Facebook, nè nant'à Twitter. Impussibule di francassi a prupaganda di l'emissione tv di France 2 Le village préféré des Français induve certi sò in campagna per fà vince à Nonza.

Bon, passeremu nant'à u nome di l'emissione "le village préféré DES FRANÇAIS". Ci tenite veramente ? Ùn n'avete abbastanza cusì ? Vulete ch'elli scalinu d'altri Christian Clavier ?

Allora noi ci dumandemu chì seria st'emissione s'è no faciamu a versione nustrale "Le village préféré des Corses", cù i lochi prediletti di i Corsi.

Hè a destinazione preferita di i Corsi. Tutte l'agenzie di viaghji corse a vi diceranu. Perchè ? Hè un misteru. Infantilizazione ? Predilezzione pè i decori in cartone, cù pakistanesi pagati menu di u SMIC vestuti in Tigrù è Mickey ? Gustu per stu lucacciu goffu, cità nova esciuta in a sinistra campagna di a Seine-et-Marne ?

Andate à sapè...

La Rocade ? Sarrola Carcupinu ? Ùn mancanu i tempii duminicali dedicati à a Santa Cunsumazione. Sempre più grandi, sempre più muderni, pè riceve sempre di più mondu.

Sin'à quandu ?

Cumu nò ? A sapete bè chì a dumenica, ci hè di più mondu chì và in un magazinu discount di e periferie bastiaccie è aiaccine ch'è in tutti i paesi di u Boziu è di l'Alisgiani riuniti.

À a dumanda "chì hè u più bellu paese di Corsica", 99% di quelli chì ne anu unu rispondenu "u meiu".

Speremu ch'ella duri. Fin'tantu ch'elli anu a furtuna di pudè tene a so casa...