I più grandi mumenti di a Francia in cuppa di u mondu

Quessa a cuppa di u mondu, sò pochi à arricurdassine. In piena cuppa di u mondu chì diventa un arnese di a prupaganda mussoliniana, a Francia hè opposta à l'Austria in ottesimi di finale, à u stadiu Benito Mussolini di Turinu, dunque.

A partita cummencia cù un culpacciu. À u quintu minutu, un austriacu ammazza u centravanti francese Nicolas, chì ghjucherà abbambanatu. Finisce 1 à 1 a partita è si ghjocanu e prulungazioni.

93u minutu : nant'à un'azzione, l'attaccante austriacu Schall si ritrova in pusizione di forighjocu (diceremu cusì per hors-jeu nò ?). Ma hè un hors-jeu di quelli tamanti. I difensori francesi pesanu u bracciu. U purtiere s'arresta di ghjucà. L'attaccante marca... è l'arbitru accorda u but.

I ghjucadori francesi prutesteranu un mumentu, nanzu di piglià u trenu per Parigi.

Ùn vale a pena di cuntavvi a storia, voi lettori di A Piazzetta a cunniscite per core.

Una grande squadra francese purtata da Giresse è Platini, una mezafinale in Seviglia contr'à l'Alemagna, a Francia chì vince 3 à 1 in e prulungazione è chì si face richjappà, u purtiere tedescu Schumacher chì manda à Battiston à l'ospidale, a Francia chì perde à i rigori... è un'odiu tenace di i Francesi per l'Alemagna chì cuntinuveghja più di trent'anni dopu.

Quattr'anni dop'à a strage di Seviglia, eccu di novu à l'Alemagna in mezafinale contr'à a Francia. Per tutti hè a rinvincita di u mundiale spagnolu. Battiston serà vindicatu !

In più di quessa a squadra di Francia hè a favurita. Ghjoca bè, è l'eliminazioni di l'Italia è di u Brasile anu impressiunatu à tutti.

Ma toccu u 9imu minutu, Andreas Brehme calma i sustenidori francesi. À u 89imu minutu, Rudi Völler ne mette un segondu. Platini ùn pò fà nunda. Finisce 2 à 0.

L'Alemani diventanu u sunniacciu di i Francesi.

Dop'à a carnavalata di a cuppa di u mondu 1998, duviamu vede ciò ch'è no duviamu vede. Ma in generale, i tenenti di u trufeu ùn riescienu mai quattr'anni dopu.

In u 2002, cummencia male per a Francia : Johnny Halliday face una canzona :

On est champion
On est tous ensemble
C'est le grand jeu
La France est debout

Ma Zidane hà u mustacciu in terra. Nant'à u terrenu hè un scumpientu. Si principia cù una disfatta contr'à u Sénégal (1 à 0, but di Bouba Diop), una partita para contr'à l'Uruguay (0-0) è un'ultima scunfitta contr'à u Danemark (2 à 0, rete di Rommedahl è Tomasson) chì mandanu i Bleus in casa soia.

Trè partite, nisuna vittoria, nisun but marcatu. Un disastru. A stampa francese li fala à dossu : troppu pretensione, una lezzione d'umilità, troppu sufficenza... è ùn hè nunda à cant'à ciò chì si passerà in u 2010.

Era u so mundiale. Zidane duvia vince a cuppa di u mondu, è finisce cusì a so carriera, di a manera a più bella. Ma in faccia, c'era Marco Materazzi.

A finale contr'à l'Italia principia bè. À u 7imu minutu, Zidane marca nant'à penalty è si permette ancu una panenka. Pocu dopu, Materazzi mette e duie squadre à parità.

Ma u fattu u più impurtante si passa in e prulungazioni. À u minutu 110, l'azezu difensore vene à stuzzicà à Zidane, chì li mette una capata in pettu... U capitanu francese finisce a so carriera nant'à un cartone rossu. Si ne fala tuttu. À i rigori Trezeguet manca u soiu. Materazzi ùn trema micca, Grosso non più. A Francia hà persu.

Siguramente a perfurmanza a più grande di a Francia in una cuppa di u mondu. Passemu nant'à a manu di Thierry Henry in partita di sustegnu contr'à l'Irlanda.

A cumpetizione gira in furia in furia à u fiascu maiò. Zeru à zeru contr'à l'Uruguay. Disfatta 2 à 0 contr'à u Messicu. Disfatta 2 à 1 contr'à a Sudafrica.

Hè un fiascu nant'à u terrenu, è hè a crisa permanente. Anelka ch'insulta à Domenech, a FFF chì mette fora à Anelka, Anelka chì scappa, a greva di Knysna, u bus, Roselyne Bachelot chì vene à fà a lezzione à i ghjucadori, Duverne chì s'intuppa cù Patrice Evra è chì lampa u so cronometru, Evra chì cerca "le traître", Ribéry chì s'affacca in Téléfoot, Gourcuff pigliatu à schjaffi...

Nant'à u bus di Knysna c'era scrittu "vers un nouveau rêve bleu". Ci anu fattu sunnià da veru.

U macciu di u seculu.

Ùn hè micca una partita di cuppa di u mondu, ma di l'eliminatorii per qualificassi à a cuppa di u mondu 1994 à i Stati Uniti.

Fermanu duie partite à ghjucà pè a Francia. Tutt'è duie in casa soia contr'à Israele è a Bulgaria. Basta d'un puntu, un semplice match nul.

A partita contr'à Israele hè digià una magagna. A Francia vince 2 à 1, eppo si richjappà in l'ultime segonde. Buts à i minuti 83 è... 93.

A lezzione ùn hè micca ritenuta. Per l'ultima partita contr'à a Bulgaria, marca a prima. Ma si face richjappà. À trè segonde di a fine i Francesi sò sempre qualificati per a World Cup... eppo Kostadinov schjocca un buttone sott'à a barra. L'attaccante manda u Parcu di i Principi in depressione.

U 17 nuvembre, in Corsica hè oramai festighjatu u Kostadinov Day.