Sta piazza di stadiu vi custerà 5 ore di strazii

Per andà à vede a finale di a cuppa di a lega l'ondeci d'aprile à vene, vi custerà un'ora è mezu d'aviò (u traghjettu per andà da Bastia à Orly), è cinque ore di strazii per andà à circà a vostra piazza. Per voi, avemu pruvatu sta sperienza unica.

Pensavate chì Furiani era un infernu solu per i visitori è i direttori di ghjocu ? Innò, hè dinù un infernu per cumprà u so bigliettu per a cuppa di a lega.

Purtantu u club avia prevenutu : in un primu tempu a vendita di i biglietti (21.000, quantunque) si ferà per l'abbunati. Ùn c'era micca urgenza dunque. Iè chì tutti quelli chì volenu cullà à u Stadiu di Francia l'averanu !

Aè, pensate. U ghjornu di l'apertura à l'alba, c'era digià u mondu. È certi anu passatu a notte in a so vittura, nant'à u parking di Furiani.

Da sente nant'à RCFM :

Primu prublema, ci hè u mondu. Assai. Ci vole à dì chì e finale sò poche in a storia di u Sporting. Una tutti i dece anni, per una sola vittoria (in u 1981).

Segondu prublema : a LFP impone à i clubs d'avè un listinu cun tutti i nomi di i sustenidori. Casata, nome, data è locu di nascita...

Iè iè, hè Big Brother. Hè cusì avà u mondu di u futbol prufessiunale.

Allora, hè a panicca in veru...

L'attesa ùn saria nunda s'ellu... ùn si metteria micca à piove è à fà un fretu chì si secca. Ciò chì duvia esse una semplice ghjurnataccia diventa un casticu.

Ciò chì eranu 500 persone s'anu da trasfurmà in 500 persone crosce, stanche, azeze è chì si cotranu.

Fora, a coda s'allonga è a fiura diventa impressiunante.

Eccu a prima pagina di Corse-Matin :

Ah iè, ferma un'altru prublema. L'abbunati ponu cumprà un bigliettu per un nò-abbunatu. È certi ghjunghjenu cun dece, vinti, trenta carte... è compranu dunque vinti, quaranta, sessanta biglietti.

È dunque vinti, quaranta, sessanta nomi, casate, date è lochi di nascita... à scrive.

U casticu si trasforma in infernu. Ci n'hè pè cinque o sei ore À U MINIMU. Certi diceranu avè aspettatu dodeci ore.

A biglietteria chì duvia chjode à sei ore chjuderà... à più di mezanotte.

In a file, e legende correnu. A mascina à stampà saria cascata in panna. Ùn ci saria ch'è una zitella, una povera impiegata per trattà tutte e dumande. Ùn ci saria più inchjostru, più carta. Un tippu saria partutu cun 2000 biglietti, ci sò pistunati chì passanu nanz'à l'altri, u prefettu hà dumandatu 400 piazze, ci hè Keyer Söze chì hè partutu cù a cascia...

Tuttu què hè falsu. Ci sò trè impiegate, cun trè urdinatori è trè stampatrice, chì facenu ciò ch'elle ponu è a facenu bè.

Da vede u filmettu di SCB TV :

Bon hè vera, ci saria vulsutu almenu cinque o sei rivindarole, o mette in piazza una biglietteria elettronica... Ma hè cumplicata.

Forse dinù, pudiamu aspettà appena noi dinù. Ma simu cusì, hè Bastia è simu in finale...

Certi sò venuti d'assai luntanu è ci vole à felicitalli :

U più impurtante era d'avè u so bigliettu. Quelli chì ùn l'anu ancu ùn anu da inchietassi. Avà ci vole à truvà una manera di spiazzà 20.000 Corsi in Parigi. Què, hè un'altru capatoghju.

Oghje, s'ampara chì l'attesa hè "solu" di duie ore. Quelli chì anderanu in Furiani si ne sortenu bè...