El sarà vera fors quell ch'el dis lu,
che Milan l'è on paes che mett ingossa,
che l'aria l'è malsana, umeda, grossa,
e che nun Milanes semm turlurù.
Impunemanch però el mè sur Monsù
hin tredes ann che osservi d'ona cossa,
che quand lor sciori pienten chì in sta fossa
quij benedetti verz no i spienten pù.
Per ressolv alla mej sta question,
Monsù ch'el scusa, ma no poss de men
che pregall a addattass a on paragon.
On asen mantegnuu semper de stobbia,
s'el riva a mangiá biava e fava e fem
el tira giò scalzad fina in la grobbia.
2
Mè cugnaa l'Ambrosin quell candiron
ch'el pareva on salamm mal insaccaa
el te m'ha daa assabrutta on bell pianton
e l'è cors in castell a fass soldaa.
La piang la mamma, e la gh'ha ben reson,
ché la mamma l'è quella che el l'ha faa:
so pader anca lu el fa el maccaron,
ma l'è semper so pà, sia bolgiraa!
Quell che me par a mì on poo stravagant
l'è a vedè i soeu fradij tutt magonent
a piang, a sospirà, a casciass tant.
massem che foeura de sto stat che chì
no ghe n'è vun pù spicc al temp present
per fagh schivà l'incomed del spartì.
3
Sissignor! Saran fors anch
quij fior bianch - che me disii,
ma per mì, sien bianch o scur,
l'è sicur - che sont servii:
saran fior, quest el capissi,
ma quand pissi - vedi i stell,
saran fior, ma bona sira
quanti el tira - ahj el mè usell!
Saran fior, ma i mee camis
hin tutt lis - per el brusacc
che gh'è dent in quella fotta
che pergotta - del pissacc.
Sissignora, saran fior,
ma el dottor - che me schizzetta
con pù el varda, pù el se intesta
che l'è pesta - malarbetta;
ma per mì già impunemanch
sien fior bianch - o scolament
ve poss dì de galantomm
che del nomm - m'importa nient
perché quand ghe disen roeusa
a la proeusa - di garon
la pò vess con tutt onor
anca on fior - la scolazion.
4
Col boeucc avert e cont in aria el venter
sont chì a speccià quaj coss.
Sciori mettimel denter,
gh'avaroo pussee gust con pù l'è gross.
Se poeù rivassev a impregnamm ben prest
prima che passa i fest
v'accorgiarii quanta memoria lassen
i voster benefizzi:
e sì che in pont de fa certi servizzi
l'è mej fà regordà che regordassen.
Carlo Porta
La questione della lingua
