10 elevi di a scola di terza B di u cullegiu anu participatu u ghjovi 31 di maghju à una surtita di e più originale. L’ogettivu era di scopre u parapendita à traversu une poche d’attività d’una ghjurnata. St’iniziazione hè stata pussibule cù u cuncorsu è u sustegnu di l’associu Cime Ale di Cervioni.
Sottu à a rispunsabilità di Carlu Felice Giammari, sei altri piloti anu rispostu prisente per ch’ella sippi una riescita l’iniziativa. Ch’elli ne sianu ringraziati.
Sottu à a rispunsabilità di Carlu Felice Giammari, sei altri piloti anu rispostu prisente per ch’ella sippi una riescita l’iniziativa. Ch’elli ne sianu ringraziati.
Un primu attellu hà permessu à ogni elevu di gunfià a vela cum’è s’ellu fussi statu in situazione di piglià u so volu. Di sicuru, era à pianu è ùn ci era nisunu risicu.
In stu mentre, Laurent Duriani, presidente di a liga di volu liberu di Corsica aiutatu da un’altru instruttore, atteppavanu versu a cima di u munticellu per u mumentu aspettatu da tutti : u battesimu cù a vela doppia piazza. Tutti l’elevi anu francatu u passu è ognunu hà saltatu.
U dopu meziornu, dui gruppi di 5 sò stati furmati è mentre chì un elevu era à e cumande di u parapendita, quattru tiravanu cù un canapu correndu per ch’ella si pesi a vela è permette cusì à u pilotu d’avè e sensazione d’un veru volu, solu solu. À traversu st’attellu, hè a cunfidenza in sè è quella accurdata à l’altri chì era di primura. Hè forse un bellu riassuntu di sta ghjurnata induve a lingua corsa hè stata a matrice postu chì i zitelli eranu in situazione d’immersione linguistica.
