In primisi
Ch’ella sia detta, ùn si vole cumpiitu quellu àrticulu è vene stazzunatu da l’ùnica sugettività di i so autori, stradati forse forse da a savviezza paisana chì ci rammenta chì : « Ci sò in Corsica trè giuvelli, Borgu, Antisanti è i Prunelli ».
Aiò à facci una spassighjata pè isse strette burghisgiane (borgolaise ?) !

U Borgu
Inalpellatu à 300 metri d’altura, supraneghja u paese di u Borgu a piaghja di Marana è dà ochju versu u mare Tirrenu è l’arcipèlagu tuscanu ch’omu pò sculunnà à tempu porgu chì ghjè un vede !
Si trova quellu paese di u Borgu inde a parte nordulevantina di a Corsica, à una quindecina di chilòmetri di Bastia, cunnosce a cumuna dipoi tren’anni una crèscita demugràffica sfrenata chì ne face a seconda cità cismuntinca cù più di 8800 abitanti !
Hè supranatu quellu paese da a cùccula matticciosa di Stella è a si stinza sinu à a piaghja di Marana in tagliu di u mare Tirrenu, a maiò parte di u so territoriu si trova in piaghja sulchighjata da fiumicelli Rasignani, Petre Turchine è Mormorana è cù una parte di u Chjurlinu.
À chì li piace à appichjà, sò tanti i lochi muntagnoli à scopre, partendu da u fiumicellu di u Figaretu si pò attippà versu Punta Orniccia (666 m), Cima di u Fornu (747 m), Petra Ellerata (888 m), Serrale      (1 053 m), Cime di i Taffoni (1 177 m) ist’ùltima chì supraneghja a cumuna è dà ochju versu u Rutalacciu è u Vignalese.

A Piaghja di Marana
Cunnosce a piaghja di Marana un sviluppu primaticciu è sò tanti i siti antichi à testimunià di u so passatu riccu assai, frà tante ricchezze omu penserà subitu à u situ di Mariana, fundatu da i Rumani è u cònsule è generale rumanu Caius Marius versu 100-90 nanzu à Cristu, fattu da sìmbulu di l’arrughjunera rumana in Corsica.
Si veca d’altronde : https://www.apiazzetta.com/O-Mithra-parlami-corsu_a2548.html
Lochi mansi è sebbiati, fù a piaghja sfruttata da sècula seculoru da a man di l’omu sinu à d’oghje.

Per isse Pieve di u Cismonte, Golu, CRDP di Corsica : Antoine Marchini è Ghjuvanbattistu Poli
Si pò pensà chì l’assalti barbareschi anu da impone à a populazione di ammuntagnà è furtificà un borgu attu à resiste ad ogni attaccu, malgradu quessa fù abbutinatu parechje volte u paese, cum’è in u 1560 induve i barbareschi cumandati da Mammi Corsu si purtonu una trentina di paisani da schjavi.

 

U paisolu di Serra
Hè ammintatu nù e crònache u paese di Serra à parte da u 1520, appartene cù Lucciana, Vignale, Borgu è Sant’Appianu à a Pieve di Mariana. Ne ritruvemu e vistighe nantu à u pianu terrieru di u 1795, è c’impara u cadastru napuleunianu ch’ellu hè tralasciatu nù a seconda metà di u XIXu sèculu.
Giuliani Audrey ; Gaffory Véronique, “ancien village de Serra,” Médiathèque Culturelle de la Corse et des Corses

A vechja chjesa piuvana di San Damianu
A cappella San Damianu di Chjurlinu vene mintuvata pè a prima volta inde un ducumentu di u 1189. Però,  puderebbe u santuariu presente ricullà à l’èpica paleocristiana. Secondu à Geneviève Moracchini-Mazel, era fatta sta chjesa da piuvania di u Chjurlinu, è un attu di u 1260 rammenta chì u prete porta u nome di piuvanu. Figura a cappella nantu à u pianu terrieru di u 1795 è s’impara ch’ella hè à tralasciu. À u XIXu sèculu, un picculu oratoriu vene appicciatu è l’ùltimu messa ci vense celebrata in u 1936. 
(Per andà più indà, si veca : Cahier Corsica n°91 Abbayes primitives et monuments du haut Moyen-Age en Corse, La chapelle San Damiano de Chiurlino à Borgo, Fagec, 1981, p.63-76).
Giuliani Audrey ; Gaffory Véronique, “ancien village de Serra,” Médiathèque Culturelle de la Corse et des Corses.

A vechja chjesa paruchjale di Sant’Appianu
Hè stata murata quella chjesa Sant’Appianu cù un apparechju regulare in petre maticciose puderebbe ricullà à u 9u o 10u sèculu. Era impurtante assai in a vita di u paese chì ci vènianu i paisani à presentà l’animaIi chì secondu à a so aggiugrafia era Sant’Appianu prima di esse vescu è màrtire, ferrale di prufessione.
Seconde a vuciata paisana averebbe stazzunatu ellu una chjave chì apposta nantu à a fronte di l’aimali avia u putere di curà ogni male, si dice d’altronde chì un ghjornu, casinchesi si sò arrubati a chjave è chì fù persu pè u sempre u so putere curativu.
Ci pudimu accorge fàciule ch’ella hè cullucata a chjesa à mezu à u campu santu, dopu esse stata chjesa paruchjale, agruttò  a Cunfraterna Santa Croce. A chjesa hè oghje ghjornu à u tralasciu.
Sò classificate e duie ciccone da munimenti storichi dipoi l’arrestatu di u 1969, a prima daterebbe di u XVu sèculu è a seconda di u 1728.
Ci vene da i tempi passatoni stu dettu : « Hè quant'è move cù e stanghe di Sant'Appianu », forse forse una riferenza à u pesu di a stàtula purtata in prucessione ?
Giuliani Audrey ; Gaffory Véronique, “ancienne église paroissiale Saint-Appien dite Sant'Appianu, cimetière,” Médiathèque Culturelle de la Corse et des Corses

U castrum di Stella 
À leghje à Daniel Istria in : Pouvoirs et fortifications dans le nord de la Corse : du XIe siècle au XIVe siècle, Éditions Alain Piazzola, Ajaccio 2005, hè digià à u XIIIu sèculu u territoriu di Marana in manu à duie rame signurile : l’Aschesi di Furiani chì règnanu nantu à a piaghja di Marana è i Bagnania chì « in u 1247 anu u pusessu di a regione chì cumprende a valle bassa di u Golu, u mare, a cala di Lavasina è a catena muntagnola di Stella ».
A sterpa di i Bagnania hà a so fonte inde l’abitatu di Bagnaia, nantu à una tozza chì strapiomba a cità di Mariana è a so catedrale : u dettu Borgu Bagnaia, un centru residenziale cù u so palatium, parechje torre è case, era stu palatium dipendente di u castrum di Stella, alzatu à 1054 metri d’altitutine, nantu à u cadastru napuleunianu fattu in u 1845, hè chjamatu l’edifiziu Torra di Stella.

Chjesa paruchjale di A Nunziata
Hè stata alzata quella chjesa à u XVIIu sèculu, hè statu l’edifiziu classificatu da Munimentu Stòricu in u 1988 è rifattu à novu in u 2008. S’hè ritrova inde i resgistri paruchjali l’ammentu di un battèsimu celebratu l’8 di maghju di u 1603.  Muratu in petra di matticciu, à u meziornu di l’edifiziu vene cullucatu un campanile massicciu è distintu. A facciata principale di suchju baroccu, fatta si à trè livelli, hè ritimata l’alzata da pilastri parechji . Sò dinù da assignalà vistighe rumàniche, mudiglioni sculpiti cù facce umane. Hè adurnata a chjesa cù un decoru pintu di suchju neo classicu.
Da sapè chì a chjesa paruchjale s’hà ripigliatu u vocàbile di a chjesa vechja di Sant’Appianu fendu li purtà a doppia tutelatura di a Nunziata è di Sant’Appianu.
A chjesa cuntene trè opere chì sò classificate da munimenti storichi :
Trè lampioni di prucessione di a Cunfraterna Santa Croce in ferru polìcromu è un mòbulu di sacristia di u XVIIIu sèculu chì venerebbe da u cunventu franciscanu di Lucciana.

Nepitaccia
À quattru chilometri da Mariana, sottu à u Borgu nantu à una costa chì supraneghja a piaghja, ci hè un locu chjamatu Nepitaccia una grotta dedicata à Santa Divota. Tempi fà, ci andàvanu i paesani in prucessione u 27 di ghjennaghju. Ci fecianu e donne i paternostri di Santa Divota, chì ghjèranu piccule cullane in perle di vetru, secondu à i burghisgiani ricullerebbe a tradizione à i primi cristiani quand’elli si piattàvanu da celebrà u so cultu.
Devota (Dei vota), vèrgine marturiata à u IIu sèculu s’averebbe campatu à i Querci di Lucciana. Figliola di un ufficiale rumana, serà stata allevata da a so nutrice inde a religione cristiana, si rendia in preghera à a grotta di a Nepitaccia pè fà e so devuzione. Però, cum’è tanti santi à i tempi di u Diuclezianu venerà ella marturiata da u prefettu rumanu Barbarus. Vènsenu fideli à spiccà a so salma è a mèssenu nantu à una barcella chì ghjunse in Petranera eppo in Mònacu, induv’ella hè sempre venerata.
Fù fatta da patrona principale di a Corsica in u 1820 !

Dinomachia di Viale
Sò unepochi i detti è i pruverbii à ammintà qualchì bischizza trà Luccianinchi è Burghisgiani : « Ùn dì mai in Lucciana chè t'ai parenti in Borgu » ; « Lucciana in lu so bugnu a Borgu torce lu rugnu » ; u clàssicu « Burghisgiani, arruba campana » è u distintu « Luccianinchi, caga lustinchi ».
Serà forse sta nemicizia paisana chì hà datu l’idea à Viale di piantà ci u so decoru. Magistratu, cunsiglieru à a corte d’appellu di Bastia, scrittore di lingua taliana ; per via di u so talentu, hè u testimoniu principale di a rumpitura culturale di a Corsica à u principiu di u sèculu XIX, chì ben chì diventata puliticamente francese, fermava di cultura taliana. Natu in Bastia u 6 di settembre di u 1787, Salvatore Viale hè l’autore d’un òpera abbundante dedicata sana sana à a Corsica : da u so « poemetto eroi-còmico » è sàtara suciale, a « Dionomachìa » (1817), a so òpera a più famosa, induv’ellu publicheghja u primu scrittu in lingua corsa « U Serinatu di Scappinu » in « lingua vernacolare »  messu in bocca à un pastore, sin’à i so assaghji di natura digià suciològica « Studi critici di costumi corsi » (1860), forse à più impurtante di e realisazione di soiu.
U decoru ?
Tagliendu la à l’accorta, si tratta di una guerra sumerina (Dionomachia) pè riguarà u baschicciu di quellu sumere defuntu, è a si càccianu l’abitanti d’ogni paese longu à u puema cù miràculi di vicende è a guerra fù dannosu pè e duie cumunità chì ci funu parechji morti è feriti.


A Prima battaglia di u Borgu 
A prima battaglia dinù chjamata : « i vèsperi corsi » in riferenza à i « vesperi siciliani » di u 1282, induv’elli funu sfracellati più di 8000 sullati francesi trà Palerma è Corleone.
Dui anni dopu à a partenza di u Rè Tiadoru, sò chjamati da Ghjènuva i francesi chì sbarconu in Corsica di ferraghju 1738, èranu tandu stradati da Boissieux.
Luccianinchi è Burghisgiani si vulianu sottumette, è dumandonu affollu à i francesi pè francà si la da l’ira da i Naziunali, u 7 di decembre sò quattrucentu i sullati francesi à vulè occupà u Borgu è u cunventu di Lucciana è riceve l’arme dii Corsi. U 12 di decembre à sera, vèdenu i francesi fochi accesi pè nantu à e creste è sèntenu sunà u cornu da ogni valle, i francesi chèrsenu aiutu à u presidiu bastiacciu.

A Battaglia di u Borgu 1768 
« Eccu a Borgu la Vittoria, rinfréscati la memoria. Qui si cuprinu di gloria li Miliziani Cirnesi, li Corsi contru i Francesi. » - Trinighellu, Dumenicu Carlotti.
 
V’invitemu à scopre un articulu scrittu qualchì annu fà da A Piazzetta :
https://www.apiazzetta.com/8-ottobre-di-u-1768-i-Francesi-piglianu-a-so-concia-in-U-Borgu_a1980.html
 
Puru s’ellu ùn si trova nantu à a cumuna di u Borgu ma in Lucciana, ci pare di primura di fà vi cunnosce a storia di u Cunventu San Francescu di Lucciana chì a so storia vene ligata à a seconda vittoria di u Borgu.
             Sarebbe statu alzatu quellu cunventu à u XVIu sèculu, ma entrerà pè l’eternu inde a storia                                nustrale di ottobre di u 1768. U fattu si stà chì durante l’assaltu di u paese di u Borgu, ricèvinu i sullati di l’armata francese sparate tante venute da i frati franciscani, serà d’altronde feritu à una spalla u conte di Marbeuf chì astiosu ch’ellu era ci vultò dopu à a scunfitta di Ponte Novu da mette ci focu !
U 13, à un’ ora dopu meziornu, parte Boissieux da Bastia cù 1400 suldati è artiglieria mastina.
U 14 decembre 1738, à u fà di u ghjornu i corsi danu l’attaccu à i francesi in u Borgu, à 11 ore di sera i francesi, spaventati si fècenu entre in Bastia.
Quantu morti francesi, ùn si sà, sò stati belli pochi, si ne parla di una cinquantina, ma, a vergogna, ella, hè tamanta !

U stagnu di chjurlinu 
Borgu cum’è Biguglia, Lucciana è Furiani agrotta nantu à a so cumuna a riserva naturale di u stagnu di Chjurlinu, hè d’altronde u stagnu u più grande di Corsica. Sta riserva di 1790 èttari trà mare è muntagna spiccatu da u mare da una banda bianca cuntene a più grande zona ùmida di Corsica, l’acque ci sò puzzaline vale à dì chì vènenu mischjate acque dolce è salite.
 
Hè ricunnisciuta à u livellu mundiale pè u so interessu eculògicu maiò è a so ricchezza biològica tamanta, a grande diversità di i so ambienti, una fauna è una flora strasurdinaria incù più di 120 razze d’acelli, cuppulate, pesci è anguille.
 
L’ acellame hè da mintuvà cù parechje spezie nidicaghjole, migratrice o invernante, si vèdenu d’inguernu millaie di folghe, di turcotti ciuffuti è di turcotti capirossi.
 
« In tagliu di u stagnu, campanu in a vegetazione è i prati ùmidi unepoche belle spezie, à l’usu aironi, butori, falchi di foce, anatre capirosse. È puru l’interessu ùn hè solu pè l’urnitulugia, ci càmpanu dinù a cistutine d’Auropa, una cuppulata d’acqua dolce, è pesci tanti chì sò piscati da l’omi dipoi sèculi è seculi.
Un situ un munimentu, u stagnu di Chjurlinu CDDP di Corsica

 

Agiugraffia 
Vescu è Cunfessore, nascì Martinu in Pannonia (Ungaria oghjinca) in u 316 è morse in Candes in u 397.
Allevatu inde una famiglia rumana, move l’arme inde l’armata imperiale à l’età di 15 anni è fù prestu mandatu in Gallia, induv’ella principia a so fama.
Principia appuntu cù u sparte di u u so mantellu (clàmide) à l’usciu di Amiens cù un andaccianu chì tardellava di fretu, si tratta di a « carità di San Martinu ».
Ci dicerete ma perchè a metà è micca u mantellu sanu ? Hè sìmplice, à quelli tempi avia u mantellu una doppia appartinenza, una parte era roba di u sullatu è l’altra di l’Imperu, face chì San Martinu dete ciò chì era soiu !

A Cunversione 
Si lascia l’armata rumana è si face battizà, fattu da scunghjuratore da Sant’Illariu vescu di Pictavi (Poitiers), fundò in Ligugé una cumunità d’asceti cunsiderata da primu munasteru di l’Uccidente.
 http://www.abbaye-liguge.fr/historique
 Fattu da Vescu di Tours in u 371 purtò u vangelu (è a spada) inde e campagne induv’ellu spiantò parechji tempii pagani.
 À sente à Ernest Papi hè San Martinu in Francia, u santu patrone di 3600 chjese è 485 paesi !
 http://ernestpapi.free.fr/SUNTA,%20Sommaire.htm

Ci dice Ghjasippina Giannesini inde u Tempi Fà : Fêtes religieuses, rites et croyances populaires de Corse volume 2 :
 
« A so cristianizazione fattiva è preputente di e campagne l’hà assuciatu inde parechje fole à divinità ch’ellu hà cumbattutu, cum’è tante stàntare, o petre scritte assuciate inde l’Europa […]
A dèdica à San Martinu, hè in Francia un ìndice di siti pagani distrutti… »
 
Hè da mintuvà dinù chì l’etimulugia di Martinu ci vene da u latinu : "martinus" vale à dì ch’ellu hè dedicatu à u Diu Marte.
 
Da sapè chì a prima di tutte e cappelle di a cristianità, fù quella chì ricevì a clàmide (cappa) vale à dì a rilìquia di a cappa di San Martinu, da quì veneria a parolla chè no impieghemu oghje.

San Martinu inde e fole nustrale 
Si ritrova u persunagiu di San Martinu in tante fole isulane, hè raprisentatu trascurrendu e campagne campichjendu da cultivadore o da pastore, ferma inde a memoria paisana u nemicu murtale di u Diàvule chì San Martinu cuntrasta e so pratese.
 
Inde una fola cunnisciuta, San Martinu hè fattu da pastore inde u Camputile, vicinu à u Lavu di Ninu. U Diàvule affacendatu à lavurà u so campu hè sfidatu da Martinu chì u dice incapace di tirà un solcu dirittu. U Diàvule pretende u cuntrariu, ma una petricella svia a vumera di u so cunceghju. In zerga, sfrumbulò a vumera chì trapanò una muntagna chjamata tandu Capu Tafunatu, eppo si ne casca inde u golfu di Galeria, induv’ellu hè turnata scugliale.
 
Si ritròvanu  d’altre fole :
 https://www.corsematin.com/article/derniere-minute/la-legende-du-lac-du-ninu
 http://www.corsicamea.fr/nature-corse/curiosites.htm
 Martinu Appinzapalu ammintatu da Ghjasippina Giannesini inde u Tempi Fà Fêtes religieuses, rites et croyances populaires de Corse volume 2 ci conta una fola chjamata : « i tredici punti di u Diavulu ».
Inde sta fola, vene u diàvule à piglià l’ànima di un paghjulaghju ch’ellu avia arricchitu, pè francàssila u paghjullaghju deve scioglie un’induvinella, San Martinu piglia a piazza di u paghjulaghju è contra u Diàvule dichjamendu una razza di Credo à parte da i primi tredici numeri.
 
Si sà ch’ellu esiste una leia diretta trà San Martinu, chjamatu u tredicèsimu apòstulu cù u nùmeru trèdici.
U fattu si stà chì quand’elli insàccavanu inde l’aghja, ùn dìcianu micca i paisani u trèdicesimu saccu ma u San Martinu !

San Martinu è u francà 
Ci dice Ghjasippina Giannesini inde u Tempi Fà Fêtes religieuses, rites et croyances populaires de Corse volume 2 chì currisponde l’11 di nuvembre :
« à un tempu di u francà ,di transizione chì principia cù i Santi è si compie pè Sant’Andria. Cum’è d’altri santi nuvembrini San Martinu hè in relazione cù e truppe di i morti chì voltanu in terra à visità i vivi. Eccu perchè si ritrova ancu quì a tradizione di e quèstue di manghjusca fatte da zitelloni, feste chì sò smariti inde u dopu guerra di u 14, in Ascu una cartulina di u 1917 ci rammenta issa tradizione, cum’è d’altronde in Allimagna cù u Martinssigen… »
 
Martinssingen in Allimagna http://laffenau.de/index.php/fotos/image.raw?view=image&type=orig&id=27

San Martinu è a Divizia  
In tante parolle di a vita paisana, ci si ritrova l’ammentu di San Martinu.
 Era invucatu da prutettore di e racolte è di e culture. Quandu chì a ghjente passava di nanzu à sigadori, o durante e tribbiere, si salutàvanu mughjendu « San Martinu », è i paisani rispundianu « divizia » !
 Fatta si a tribbiera, quandu chì e biade tribbiate èranu ammansate, ci si piantava in cima una crucetta detta di San Martinu, d’altronde a rota di u mulinu è di e volte u tribbiu portavanu anc’elli una crucetta sculpita chjamata San Martinu, avia u putere di arricà divizià è di alluntanà i spiriti.
 Ci dice Pascal Marchetti inde l’Usu Corsu : « Infine avà u granu era tribbiu è mondu, e avianu messu u sammartinu annant’à a mansa tonda »

San Martinu è u Vinu 
« In San Martinu u boiu piscia sangue è a botte piscia vinu », « À a San Martinu, u mostu torna vinu », sò tanti i detti è i pruverbii à rammintà e devuzione ch’elli avianu i vignaghjoli nustrali pè San martinu.
 Ci dice Ghjasippina Giannesini ch’ella hà a celebrazione di San Martinu sumiglianze cù e feste dionìsiache : « Hè accertata a leia cù Dionysos in Ghjunchetu (A ribicchina) induve a petra chì ghjuvava di scolu chjamatu u troghju, fù scelta di forma fàllica, segnu prupiziatoriu, alluntanà i spiriti è chjamà a divizia simbulu di e forze di vita è passava pè alluntanà i spiriti
Si cantava una sàtara in San Martinu in onore di u Santu :
 
« Frati di questu cunventu
Ci hè ghjuntu una brutta chigna
O Signore, chì spaventu
Si hè siccata a nostra vigna
 
Noi frati di San Martinu
Ùn sapemu cumu fà
Oghje, ùn avemu più vinu
Ùn pudemu più cantà
Alleluia, Alleluia
 
 In San Martinu di Lota
 Pè San Martinu, inde u paese di San Martinu di Lota, fècianu i zitelli i famosi musculotti cù tubi di bambù (canna d’India) o di scorza di castagnu carchi à polvera à fucile è i lampavanu dopu à a messa è caccià i gattivi spiriti di i campi è di e vigne.
 
Tradizione ch’omu pudia ritruvà in Patrimoniu, chjamate quì e pippe chì èranu imburrate cù a pòlvera nera.
 
Ci si trova da sottu un innu cumpostu da l’Abbatu Muracciole di Vivariu in l’onore di San Martinu sempre cantatu da a Cunfraterna Santa Croce di San Martinu di Lota.

Casevechje, San Martinu è E Ville 
In questi paesi, esisitia una tradizione particulare quella di spiculà e botte assaghjà u vinu novu, ogni sera di a nuvena di San Martinu.
U ghjornu di San Martinu u prete fecia u giru di e cantine pè benedì u vinu novu, ci era dopu a messa à a cappella di Casevechje eppo a prucessione.
À casevechje si fecia un vinu particulare u picciolu chjamatu dinù u vinu di San Martinu ci dice Pierre Piereschi citatu inde Tempi fà : « Quandu vindemiàvamu, si cuglia malmasgia, Niellucciu è Genuvese è i mischjavamu. Empiiamu i curboni è i viutavamu inde i palmenti è barchighjàvamu eppo l’ùltimu mostu riguaratu dopu à dece ghjorni ghjuvava pè fà u picciolu, u vinu era rilevatu ogni quattru ghjorni  pè arreghje a fermentazione, stu vinu era dulcissimu.
 
San Martinu in San Gavinu di Fium’orbu 
A ci dice Charles Bartoli inde u Tempi Fà : « U ghjornu di San Martinu, pigliavanu i zitelloni un bichjere è andàvanu à girà e case à fà l’usciu usciolu pè reimpie u so bichjere dicendu « pè San Martinu »

San Martinu in Sotta
 U ghjornu di San Martinu, permettia a festa à l’abitanti di i 36 paisoli di ritruvassi, istu territoriu era d’alronde chjamatu à u XVIIu sèculu a « commarque de San Martinu » era una un locu di impiaghjera di l’Alta Rocca.
 
In Sotta, quand’èranu ingratate l’alive inde u fragnu, prima di fragnà le si dicia à voce alta « À San Martin » listess’affare pè l’uva è si dicia : « San Martinu, ogni butti tira vinu » o ancu pè e tribbiere : « San Martinu, incù a pala è u bacinu ».
 
Unu di i 36 paisoli ammintati sopra hè quellu famosu di Chera, vèculu di Ghjuvann’Andria Culioli dettu u Barbutu di Chera, chì ci lascia una puesia bella à nantu à San Martinu ricacciata da : « Ghjuvann’Andria Culioli, u Barbutu di Chera » scrittu da Mathée Giacomo-Marcellesi.

San Martinu in Bastia 
C’impara l’Almanaccu di Bastia ch’ella si fecia in Bastia a cugliera di u rosumarinu pè a sfuma, era imbalsamata ogni pezza di a casa ed era spostu u rsumarinu nantu à carboni fucosi. Prutegia sta fumigazione di l’ochju.

San Martinu in Patrimoniu 
Quand’omu vede appaghjatu San Martinu è Patrimoniu, li vene prestu à mente a festa di l’11 di nuvembre cù l’assaghju di u vinu novu è a so chjesa epònima forse una di e più ritrattate di nostru.
 
Hè San Martinu celebratu in Patrimoniu dipoi u 1530, a messa era parata è era fatta dopu à e sulennità religiose a benedizzione di e vigne à l’intornu. Impunia a tradizione ad ogni Patrimunincu di accoglie un pellegrinu in casa soia pè sparte a cullazione o a cene di u ghjornu.
 
Hè bella stretta a relazione trà u paese di Patrimoniu è u Santu, chì ci sarebbe ghjuntu chjamatu da i paisani pè appacià a sicchia è l’invasione di i grilli (funzione interessante di taumaturgu), li averebbe rispostu Martinu di pregà è di esse devoti versu u Signore. Ciò ch’elli fubbenu cun cautella è pè felicità li averebbe dettu Martinu insignendu u paese « Questu hè u mo patrimoniu », à sente à Christian Andreani, s’averebbe appuntu da dì « U Patrimoniu » quandu si parla di u paese.
 
 
A Chjesa San Martinu di Patrimoniu
Hè stata alzata quella chjesa famusìssima nantu à u paisolu di Cardetu. Affacca u primu ammentu di a chjesa inde una visita pasturale di u 1575. Vicinu vicinu à quella chì era à u principiu di u XVIIIu sèculu una chjesola ci si pudia truvà a casazza di a Cunfraterna Santa Croce è un campu Santu. Pudimu pensà chì à l’origine i trè casamenti eranu vicinìssimi
Data assignalata pè a custruzzione di a chjesa San Martinu, u 6 d’ottobre di u 1771, u piore di a Cunfraterna Santa Croce nota inde i registri di a Cumpagnia à u capitulu di e spese : « “Per la fabrica di San Martino, pagato unito alli procuratori all’architetto lire sessanta tre e soldi quindeci”.
Si sprime a sensibulità barocca cù forme è decori distinti, ci hè da fà casu, in Patrimoniu, à una chjesa alzata alla muderna chì rispechja un estru architetturale chì si sprime in a so intimità nascosta.
« A piazza di a chjesa hè ingirata di muragliette à barrette in teghje. Certe sò scritte o dissegnate à ghjocu di e 9 pedine.
 
San Martinu in Corsica 
C’impara Lisandru de Zerbi in : « Messa è Santi nustrali » ch’ellu hè festighjatu in Bisinchi, U Canale di Verde, Canavaghja, Cùtuli, Erone, Èvisa, Letia, Lozzi, Nucariu, Patrimoniu, Ruspughjani, San Martinu di Lota, Santa Lucia di Mercuriu, Sari d’Urcinu, Scata, Siscu, Sotta, Tàvacu, a Vulpaiola, u Viscuvatu.
 
Sò tante e casate di nostru à rammintà l’impurtanza di San Martinu in Corsica
Martini, Martinenghi, Martinelli, Martinetti, Martinaggi, Martinucci, Demartini.
I detti è e spressione.
 
Si veca d’altronde u travagliu di prima trinca di censu realizatu da Ernest Papi
in http://ernestpapi.free.fr/SUNTA,%20Sommaire.htm induve s’ampàranu detti, spressione è pruverbii :
 
 
« Ùn piuvì, ùn piuvì chì n’ùn voli San Martì. »  (11/11)  (v. festi/mesi)
« À San Martinu, ogni mostu hè vinu.”
“ À San Martinu u mostu vale vinu.” (11/11)
« Per San Martinu (11 /11) ogni botte tira vinu. »
« Vene li Santi chì inchjarisce u vinu ; à l’undici  risplende San Martinu. »
« Pè i Santi si vestenu i fanti, (1 /11), à San Martinu, grandi è piccini (11 /11). »
« San Martinu è figlioli maschi ! » (v.caccia)
 
Si dicia à i ghjovani sposi. San Martinu hè u santu di a divizia. Si bramava à l’agricultori una bona ricolta briunendu : « San Martinu ! » Duvivani risponda : « Par tutti ! » o ancu « Cussì sia ! ». Santu di i cacciadori di Corsica, era prigatu quandu si spartiva u signari. U signari faci parti di « A robba di San Martinu ».
 « Hè robba di San Martinu. » (v. caccia)
Voli dì, hè una robba cumuna, chì si spartiva tra l’aghjenti. U signari faci parti di sta robba. Hè spartutu tra i cacciadori, è al dilà, incù l’aghjenti vicini o stretti.
« San Martinu, l’acqua face vinu. »
“San Martinu, pane è vinu!”
Santu di divizia è di spartera. U ghjornu di San Martinu, i ziteddi cantuchjighjani sta dumanda davanti à tutti i porti di u paesu spirendu riceva qualchì bonbò.
« Di trenta o di trent’unu, San Martinu hè l’ondici. » (v. mesi)
Si dicia à i ghjovani sposi. San Martinu hè u santu di a divizia. Si bramava à l’agricultori una bona ricolta briunendu : « San Martinu ! » Duvivani risponda : « Par tutti ! » o ancu « Cussì sia ! ». Santu di i cacciadori di Corsica, era prigatu quandu si spartiva u signari. U signari faci parti di « A robba di San Martinu ».

Creazione intornu à San Martinu
Bellisisma canzona scritta da Rinatu Coti è cantata da i Maistrelli à l’occasione di u Festivale di l’Autunnu è di a Ruralità in Sotta.

San Martinu inde l’affrescu d’Omessa
Opera di Giovanni da Piamonte, discipulu di u grande maestru Piero della Francesca, fù ritrova in u 2014 in chjesa Sant’Andria d’Omessa (pieve di Tàlcini)
L'affreschi rapresentanu in a parte bassa u martire di San Petru, nant'à a croce. Hè unica in Corsica.
È in a parte alta si vede à San Martinu chì strappa a so cappa per dalla à un poveru. Quessa hè unica in Auropa : u poveru hè rapresentatu cum'è un zitellu, capellirosu è cù zampe d’acellu, ci dice Christian Andreani u Presidente di a Reta eurupea di l’itinerariu culturale San Martinu ch’ellu puderia esse u Diavule raprisentatu da pòveru in canna.

San Martinu in altrò
Esiste in Polonia una traduzzione u ghjornu di San Martinu, è chì si chjama : « l'oca di San Martinu », stu ghjornu di l'ondeci di nuvembre si manghja un'oca.
Sta tradizione esiste in parechji paesi d'Auropa centrale è di u nordu, cum'è in Allemagna, induve, l’ ondeci nuvembre à 11 ore è 11minuti principia un carnavale è e prime tumbere d'ocche ( e « martinsgans ») chì anderanu finu à natale.
Un'altra tradizione pulunese  per San Martinu hè nata in u 1891.
Un ghjornu, u prete John Lewicki, prete di a parochja San Martinu di Posnan fece una prèdica nantu a povertà, a spartera è l'aiutu, dumandò tandu à i so paruchjani di porghje una manu versu i più pòveri.
Un giòvanu panetteru hè presente, è vole dinù ellu prupone participà  à iss’andatura cusì bella.
A notte stessa, intese l’iunghjole di un cavallu di nanzu à a casa, piglia è sorte di casa, scopre un cavallieru coltu à nantu à un bellu cavallu chì li surride eppo smarrisce, firmerà in terra un ferru à cavallu. A sèguita l’induvinate puru, l’annu dopu offre i so curnetti in forma di ferru à cavallu à i più bisugnosi di e so sponde, oghje ghjornu sò più di 400 tunnellate di curnetti trà u 9 è l’11 di nuvembre.

In varie regione d’Allimagna, d’Aùstria, di Sguìzzera , di u Meziornu di u Tyrol hè l’usu dinù di urganizà prucessione cù fiàccule u ghjornu di San Martinu, sò à spessu accumpagnate da un cavallieru coltu nantu à una cavalcatura bianca. Hè vestute da legiunariu rumanu, si parla in certi lochi « prucessione di a cavalcata di San Martinu » (Martinszug).