SIWEL | Agence kabyle d'information

Awal n tejmilt i umaru Ʃmer Mezdad, amejjay n Teqbaylit

19/12/2016 - 22:26

IDLES (SIWEL) — Deg useggas γer wayeḍ tettnerni tsekla Taqbaylit, yettili-d umaynut, ttefaγen-d yidlisen ; tajmilt ad tuγal i wid yesseqdacen ticcert, gar-asen Dda Ʃmer Mezdad, amejjay-amaru, i yessulin isem n tira s teqbaylit γer tegnaw s yidlisen-is i d-yessufeγ s Teqbaylit-is yettnadin γef tlelli-ines. Ḍefret amagrad-a swayes ad tissinem kra γef leqdic n Dda Ʃmer Mezdad.


Awal n tejmilt i umaru Ʃmer Mezdad, amejjay n Teqbaylit
Ʃmer Mezdad d yiwen seg imyura imeqqranen i d-turew tmurt n Yiqbayliyen, akal i d-yefkan aṭas n yirgazen d tlawin i irefden aanay n tnekkit-nneγ, s tira d umennuγ i d–ufa ass-a.

Γas ma yella lḥirfa n Dda Ʃmer Mezdad d aḥric n tujjya (d amejjay), lameɛna, anecta ur s-d-yella d afrag neγ d ugur i wakken ad yanef i ubrid n tjaddit-is, akken i d-ufan sebba xilla n yemdanen i yetterwalen γef wagla-nsen deffir tecḍaṭ n uxeddim-nsen.
Ʃmer Mezdad d win yefkan s waṭas afus n tallelt i kra n umdan i yewḍen γur-s ama s wawal yelhan neγ d tikti neγ s tira, mačči d yiwen neγ sin i yecnan tamedyazt-ines. Yekki deg ugraw n Imaziγen Imula γer tama n Dda Ferḥat, iga aṭas n tezwarin i yidlisen n yimyura d yimedyazen niḍen. Iseggasen-a ineggura, yesnulfa-d yiwet n tesγunt n trisiti www.ayamun.com deg ara d-tafem tasekla tazedgant yebnan γef lsas atrar, yerna yezmer yal yiwen deg-wen ad yefhem.

Zemmreγ ad d-iniγ lemmer ulac Duktur Mezdad, tilli aṭas i ulac deg teqbaylit ass-a, imi leqdic-is d win yebnan γef wazalen n tmetti taqbaylit yerna d amerkanti ; d itri i d-fkan yigenwan i wakken ad icebbeḥ tasekla-nneγ.

Taneggarut n lḥal, ad ssutreγ ad iyi-isuref Dda Ʃmer ma ccḍeγ deg kra n yimeslayen i d-nniγ fell-as. Atna-ya γur-wen yizwal n yidlisen-is i d-kkseγ seg ungal-ines aneggaru ‘’Yiwen wass deg tefsut‘’.

Idlisen i d-yessufeγ seg 1977 γer 2014:

- Tafunast igujilen, d ammud n yisefra, 1977 akk d 1993
- Iḍ d wass, d ungal, 1990 akk d 2010
- Tagrest urγu, d ungal, 2000
- Tuγalin, d ammud n tulisin, 2003
- Ass-nni, d ungal, 2006
- Tettḍili-d ur d-tkeččem, d ungal, 2014
- Yiwen wassdeg tefsut, d ungal, 2014
- Adlisfus n tmaziγt tatrart deg ublug : www.ayamun.com/adlifus1.pdf

Rnu γer waya, ammud-ines n tullisin ‘’Tuγalin‘’ i yettwasuqlen γer tefransist deg unebdu yezrin.

Akli Muhubi
SIWEL 192216 DEC 16



Kabylie | Afrique du nord | Politique | International | Sport | Culture | Economie / Finances | Sciences Tech