SIWEL | AGENCE KABYLE D'INFORMATION

Tazrigt tis tlata n temsizelt n tmedyazt taqbaylit n Yennayer 2967

05/02/2017 - 16:51

IDLES (SIWEL) — Akken nuɣ tanumi, temkerḍit n Ikeğğan di tɣiwant n tifra, lεerc At Mensur, yal aseggas yettili-d leqdic d amerkanti s temsizelt n tmedyazt taqbaylit ɣef usentel n Yennayer , aya d isseɣ imi tamedyazt s umata d izigher n yidles aqbayli , ihi deg umgarad-agi ad walim amek i d-tettili temsizelt-agi.


Tazrigt tis tlata n temsizelt n tmedyazt taqbaylit n Yennayer 2967
Am wakken id nmeslay ɣef temsizelt i d-yettilin yal aseggas deg wayyur n yennayer di temnaḍt Ikeğğan, ad nebder kan iseggasen i yezrin tamkerḍit n umaɣras Hebhoub Arab Ikeğğan , Taɣiwant n Tifra, d tin yellan ɣef uqerruy n temsizelt-agi dima tsuddus-it. Tikkelt-a tella-d s tallelt n Usqamu Aɣiwan n Ilmeẓyen n Ukeffadu iy-a yedduklen i leqdic akken ad yili d amerkanti.

Deg tezrigt-a ufraren-d tlata n yimenza, deg umḍiq amezwaru d Mass Hettak Moussa si temnaḍt Ukeffadu taddart At Sεada d win yeddan di laεmer, Dda Mussa d amedyaz i yettekkin dzg aṭas n tfaskiwin n tmedyazt, daɣen atan deg usurif n usuffeɣ n wammud isefra, ma d amḍiq wis sin d yiwet n tlemẓit tesεa 14 iseggasen d tin iḥemlen tamedyazt si zik tagi d Massa Abdous Chanez si temnaḍt Ukleffadu di taddart n Tewrirt , amḍiq aneggaru neγ wis tlata n yiwet n tmeṭṭut d tamedyazt d tin i d-yefkan acḥal n wamudden n yisefra d yidlisen ɣer ssuq, tagi d Massa Kenza Djurdjura si temnaḍt n Weqbu.

Mass Mourad Touak yellan d amezzarfu n tesqamut n temsizelt, u daγen d aselway n ‘’tidukla Itri Iburayen’’ yerna d amedyaz ifazen.

Tamkerḍit Ikeğgan d tin yellin deg useggas 2012 win yellan ɣef uqerruy-is yiwen yitri id-yettaken ṭṭiya i yidles daɣen d win id yewwin amecwar ɣezzifen deg umussu-agi, d win i d-yefkan aṭas i yidles amaziɣ s umata akked d tsekla taqbaylit ad d-nebder kan lqahwa n tsekla d tin I yewḍen ɣer weṭṭun wis 13, wagi d Mass Azedine Yamouni I wumi ara dreγ tajmilt.
Timlilit-agi n tiririyin n warrazen tella-d ass 31/01/2016 di temkerḍit n ikeğgan anda yella uselway n tesqamut n temsizelt Mass Mourad Touak akked d uselway n Usqamu Aɣiwan Ilmeẓyen Ukleffadu, akken daɣen ugten yinebgawen i d-yussan ḥeḍren i temlilit-agi, gar-asen Boubekeur Ameriout d anaẓur, Aissa Idoughi d win yellan d aεeggal n tɣiwant ukeffadu, Hakim Ferkioui d amedyaz, Lounes Zinet d amusnaw, Mhed Fergan d anaẓur n terbaεt n umezgun n temkerḍit ikeğgan Izumal,… d wiyaḍ yal yiwen s yisem-is.

Akka i tessuli taggara n tezrigt tis tlata n temsizelt n tmedyazt taqbaylit n Yennayer i d-tettheggi temkerḍit n Ikeğğan, taɣiwant n Tifra, imi d afud i tmedyazt taqbaylit, d afud i umuddu n usirem i yimedyazen d tmedyazin d wid i d-yettnekkaren akken ad snernin azal n tutlayt d yidles-nneγ.

Tekfa temlilit s usenmmer i d-yefka Mass Azedine Yamouni anehmal n temkerḍit i Massa Thiziri d tin yellan deg umaṭṭaf n Summam, wid yellan ɣer tugniwin Zahir akked d Hakim, imedyazen d tmedyazin i yettekkin di temsizelt, imezdaɣ n tɣiwant n Tifra yal yiwen s yisem-is, daɣen wid yettillin dima di ttiεad-at i d-tettheggi temkerḍit, akked wid id yefkan afud ama si liqrib naɣ si libεid.

Ghilas Abdous
SIWEL 051230 FEV 17