A NASCITA DI U DRAGONE

A NASCITA DI U DRAGONE (CHINA)
 
Trà l’animali sacrati
À l’omu rigalati
Pesciu trà l’onde d’argentu
Nota, spampillente
 
Acellu ver di u Sole
Bellu è graziosu vola
Cavallu galuppa è corre
Trà l’immense piaghje d’oru
 
Ed in China, tempi fà
Venerati, cum’è divinità
 
Serpu si strascina, astutu
Pè spianicce nude
Bufalu hè lu tesoru
Di i cultivatori
 
Ed in China, tempi fà
Venerati, cum’è divinità
 
Di cumbatte si stanconu
Creonu u dragone
Cù l’animali sacrati
À l’omu rigalati
 
Diventonu unu solu
Ci conta l’antica fola
Pè fà rivene la pace
È u cunflittu ormai tace
 
Ed in China, sempre avà
Veneratu, cum’è divinità