CARRATTERI À ZOZZÒ

Caratteri à zozzò
 
Ùn ti piace à pacà
Passi u to tempu à cuntà
Omu ti chjama Harpagò
Falla finita o rancicò !
O rancicò !
 
Niscentria è sgalabatezza
Ma nisuna gattivezza
Sì à spessu à capu in ghjò
O lu mio corciu baullò !
O baullò !
O rancicò !
 
Di a volpe ai a malizia
Cerchi sempre a divizia
Lu sia quì o in altrò
A sai longa o malignò !
O malignò !
O baullò !
O rancicò !
 
À core persu è spenseratu
Allisciatu è prufumatu
Per dunnighjà sì u migliò
Ma attenti o seduttò !
O seduttò!
O malignò !
O baullò!
O rancicò!
 
Ti senti sempre malatu
Ma si passa in lu to capu
Lascia corre u sgiò duttò
O ipocundriacò !
O ipocundriacò !
O seduttò !
O malignò !
O baullò !
O rancicò !